काठमाडौं । एएफसी एसियन कप छनोट र सिंगापुरसँग हुने मैत्रीपूर्ण खेलको निम्ति नेपाली राष्ट्रिय पुरुष फुटबल टोलीको घोषणा भएको छ । अखिल नेपाल फुटबल सघं (एन्फा)ले एएफसी छनोट र सिंगापुरसँग हुने मैत्रीपूर्ण खेलको निम्ति पुरुष राष्ट्रिय टोलीको नाम सार्वजानिक गरेको हो ।

मुख्य प्रशिक्षक म्याट रोसले २३ सदस्य टोली घोषणा गरेका हुन् । नेपालले आगामी मार्च २५ गते एएफसी छनोटअन्तर्गत मलेसियाविरुद्ध खेल्नेछ भने त्यसअघि मार्च २१ गते सिगांपुरसँग मैत्रीपूर्ण खेल खेल्नेछ ।

एन्फाले सार्वजानिक गरेको नामवाली अनुसार गोलकिपरमा किरण चेम्जोङ, दिप कार्की र एन्जल श्रेष्ठ रहेका छन् । डिफेन्डरमा अनन्त तामाङ, बिमल पाण्डे, सनिस श्रेष्ठ, रणदिप पौडेल, सुमित श्रेष्ठ, अभिषेक लिम्बु र सुमन श्रेष्ठ रहेका छन् ।

त्यस्तै, रोहित चन्द, लकेन लिम्बु, रोहन कार्की, मणी लामा, भरत खवास, एरिक विष्ट, मनिस डांगी, कृतिश रत्न छुँजु र आयुस घलान मिड फिल्डर स्थानमा समावेश भएका छन् । त्यसैगरी फरवार्डमा जिलेस्पी जंग कार्की, अन्जन विष्ट, सुवास ठकुरी बम र रेजिन सुबा छन् ।