काठमाडौं । काठमाडौं उपत्यकासहित देशभरका नौ सहर सोमबार (फागुन २६) अस्वस्थकर बनेका छन् । वायु प्रदूषणको तह बढेसँगै नौ सहर अस्वस्थकरको सूचीमा परेका हुन् ।

वातावरण विभागका अनुसार, काठमाडौंको शंखपार्क सोमबार बिहान ‘सर्वाधिक’ प्रदूषित बनेको छ । सोमबार मध्याह्न १२ बजे शंखपार्कको वायुको गुणस्तर मापदण्ड (एक्यूआई) १७२ रहेको वातावरण विभागको तथ्यांक छ ।

सोही समयमा देशका नौ सहर ‘अस्वस्थकर’ छन् । काठमाडौंको रत्नपार्कको एक्यूआई १५९ पुगेको छ । ललितपुरको भैँसेपाटी र खुमलटारको एक्यूआई क्रमश: १६९ र १५५ छ । भक्तपुरको एक्यूआई पनि १६१ छ ।

उपत्यकाबाहिर काभ्रेको धुलिखेलको एक्यूआई १५५, देउखुरी दाङको १५४ र धनगढी कैलालीको १५३ पुगेको छ । यीबाहेक अरू सहरमा एक्यूआई १५० भन्दा कम छ ।

एक्यूआई १०१ देखि १५० को वायु बालबालिका, वृद्धवृद्धा र दीर्घरोगीका निम्ति अस्वस्थकर हुन्छ । त्यो १५१ देखि २०० सम्म पुगेमा सबैका निम्ति अस्वस्थकर हुन्छ । यस्तै, २०१ देखि ३०० सम्म पुगेमा ‘अति अस्वस्थकर’ र त्योभन्दा माथि भएमा ‘खतरनाक’ तथा बन्दै जाने विश्व स्वास्थ्य संगठन (डब्ल्यूएचओ)को मापदण्ड छ ।