काठमाडौं । सुन्दर यातायातको विद्युतीय बसमा बुधबार राति चार्जमा राखेका बेला आगलागी भएको छ ।

जिल्ला प्रहरी परिसर काठमाडौंले धुम्बाराहीस्थित सुन्दर चार्जिङ स्टेसनमा मर्मतका लागि ल्याइएको गाडीमा धुवाँ देखिएको र आगो समेत लागेको बताएको हो ।

प्र–३–०१–००५ ख ९६३९ नम्बरको बिजुली बसमा राति ११ बजेर २१ मिनेटमा घटना भएको हो । आगलागीपछि दुई दमकलसहित प्रहरी वृत महाराजगञ्जको टोलीले १२ बजेर १५ मिनेटमा पूर्ण नियन्त्रणमा लिएको जनाएको छ ।

गाडीमा आंशिक क्षति भएको र प्राविधिक टोलीले जाँच गरेको प्रहरीले जनाएको छ ।

सुन्दर यातायातका सञ्चालक भेषबहादुर थापाले घटना सामान्य भएको र गाडीमा थोरै क्षति भएको बताएका छन् । “हामीले बिमा दाबी पनि नगर्ने भएका छौँ, सामान्य क्षति भएको छ, ठूलो घटना हैन,” थापाले भने ।

उनले गाडीको मुख्य ब्याट्री नभएर स्टार्ट गर्न, बत्ती बाल्न जस्ता कामका लागि प्रयोग हुने लिड–एसिड ब्याट्रीमा क्षति भएका छन् ।

“लिड–एसिड ब्याट्रीमा आगोभन्दा नि धुवाँ देखिएको हो । मुख्य ब्याट्री २७५ किलोवाटआवरको छ त्यो ब्याट्रीमा आगो लागे सामान्य हुँदैन,” उनले भने ।

उनले गाडीको आगो निभाउन दमकल नभएर धाराकै पानी प्रयोग गरिएको र भित्र पानी हाल्न सिसा फुटाइएको बताएका छन् । गाडीमा कुनै ठूलो क्षति नभएको र सुन्दर यातायातका सबै गाडी सुरक्षित रहेको उनको भनाइ छ ।