काठमाडौं । अर्थमन्त्री विष्णुप्रसाद पौडेलले दुई वर्षअघि नै देशलाई सम्पत्ति शुद्धीकरणको ‘ग्रे लिस्ट’बाट निकालिने बताएका छन् । बुधबार प्रतिनिधिसभाको बैठकमा आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, ०८१ माथि अस्वीकारको सूचनामा उठेको प्रश्नको जवाफ दिँदै उनले वर्तमान सरकारले ‘ग्रे लिस्ट’मा नलगेको बताए ।

‘ग्रे लिस्ट’मा कसले पुर्‍यायो भन्ने विषयमा पछि फेहरिस्त प्रस्तुत गर्ने उनको भनाइ छ । पौडेलले ‘ग्रे लिस्ट’बाट निकाल्न सरकार गम्भीर रहेको पनि बताए ।

“हामीलाई दुई वर्षको समय छ । त्यो दुई वर्ष लगाउँदैनौँ । दुई वर्षअघि नै ग्रे लिस्टबाट निकाल्छौँ,” उनले भने । 

उनले राष्ट्रिय स्वतन्त्र पार्टी (रास्वपा)का सांसद स्वर्णिम वाग्लेले वर्तमान सरकारलाई ‘ग्रे लिस्ट’मा लगेको आरोप लगाएकोमा आपत्ति जनाए ।

“अरू कसैले भनेको भए एउटा कुरा थियो । माननीय स्वर्णिम वाग्लेलाई कुन कालखण्डमा के हुनुपर्थ्यो, के भएन धेरै राम्रोसँग थाहा छ । उहाँले ग्रे लिस्टमा पर्नुको आरोप यो सरकारलाई लगाइरहनुभएको छ । सदनसमक्ष गलत बोलेको छु भन्ने उहाँलाई थाहा छ,” उनले भने ।

सम्पत्ति शुद्धीकरण निवारणसम्बन्धी कानुनको परिपालनामा चुक्दा नेपाल ‘ग्रे लिस्ट’मा परेको छ ।