काठमाडौं । रियाल बेटिसविरुद्ध अग्रताका बाबजुद २–१ ले पराजित भएपछि स्पेनिस ला लिगामा रियाल मड्रिड तेस्रो स्थानमा झरेको छ ।

शनिबार राति बेटिसको मैदानमा घरेलु टिमलाई जित दिलाउन जोनी कार्डोसो र इस्कोले गोल गरे । रियालका ब्राहिम डियाजले गोल गरे पनि हार टार्न सकेनन् ।

खेलको १०औँ मिनेटमा डियाजको गोलमा रियाल मड्रिडले अग्रता बनाएको थियो । ३४औँ मिनेटमा कार्डोसोले गोल गर्दै घरेलु टिमलाई खेलमा फर्काए । ५४औँ मिनेटमा इस्कोले पेनाल्टीमार्फत गोल गर्दै बेटिसलाई २–१ को अग्रता दिलाए ।

रियालका एन्टोनियो रुडिगरले जेसस रोड्रिगेजमाथि फाउल गरेपछि बेटिसले पेनाल्टीको अवसर पाएको थियो, जसमा रियालकै पूर्वखेलाडी समेत रहेका इस्कोले कुनै गल्ती गरेनन् । इस्कोले रियाल मड्रिडमा नौ वर्ष बिताएका थिए । 

जितसँगै २६ खेलबाट ३८ अंक जोडेको बेटिस तालिकाको छैटौँ स्थानमा उक्लिएको छ । समान खेलबाट ५४ अंकको रियाल तेस्रो स्थानमा छ । जारी सिजनमा रियालको यो चौथो हार हो ।