काठमाडौं । चलचित्र ‘लाज शरणम्’ केन्द्रीय चलचित्र जाँच पास समिति (सेन्सर बोर्ड)बाट पास भएको छ । आज सेन्सर बोर्डले ‘लाज शरणम्’लाई सेन्सर पास भएको प्रमाणपत्र प्रदान गरेको छ । 

उच्च अदालत पाटनको आदेशसँगै चलचित्र ‘लाज शरणम्’ प्रदर्शन हुन्छ कि हुँदैन भन्ने अन्योल थियो । सेन्सर बोर्डले सेन्सर पास गरेसँगै अब यो चलचित्र पूर्वनिर्धारित मितिमै प्रदर्शनमा आउनेछ । 

सिताराम कट्टेल ‘धुर्मुस मुख्य भूमिकामा रहेको चलचित्रमा उनको ‘गेटअप’ मिलेको भन्दै उच्च अदालत पाटनमा मुद्दा परेको थियो । 

पूर्वमन्त्री तथा कांग्रेस नेता मोहम्मद आफतव आलमको तर्फबाट उनको अनुहारसँग मिल्ने मुखाकृति, पहिरन, जीउडाल, कपाल मिलाई शैली, हाउभाउ र लवज आफ्नो अनुमतिबिना प्रयोग गरिएको भन्दै त्यसलाई रोक्न माग गर्दै रिट दायर भएको थियो । 

केन्द्रीय चलचित्र जाँच समितिले अनुमति नदिई रोक्नसक्ने भन्दै आदेशमा त्यसअघि निवेदकको मुखाकृति र आवरणसँग हुबहु मिल्ने गरी पात्रले अभिनय गरेको चलचित्रको विज्ञापन सामाजिक सञ्जाल तथा अन्य सार्वजनिक सञ्चारमाध्यममा प्रचारप्रसार नगर्न आदेश जारी गरेको थियो । 

‘लाज शरणम’को प्रचारप्रसार सामाजिक सञ्जाल र सञ्चारमाध्यममा नगर्न/नगराउन अदालतले अन्तरिम आदेश दिएको थियो । 

‘लाज शरणम्’ले फागुन १४ गतेका लागि रिलिज डेट लिएको छ । बुधबार ट्रेलर सार्वजनिक गर्ने कार्यक्रम रहेको थियो । तर, अदालतको आदेशसँगै रोकिएको थियो । 

‘लाज शरणम्’लाई कुमार कट्टेलले निर्देशन गरेका छन् । 

‘सक्किगोनि’ टिमले बनाएको यस चलचित्रमा धुर्मुससँगै अर्जुन घिमिरे, सागर लम्साल, हरिश निरौला, प्रियाना आचार्य, विजय बराल, महेश त्रिपाठी, अर्पण थापा, रेणु योगी, विजय लामा, मुकुन्द श्रेष्ठ, माला लिम्बूलगायत कलाकारको अभिनय छ ।

जेपीटी क्रियसनको ब्यानरमा निर्माण भएको सिनेमामा नवीन श्रेष्ठ निर्माता, राम नरेश शाह र सिर्जना खड्का सहनिर्माता छन् ।