काठमाडौं । घरेलु मैदानमा जारी चारदेशीय अन्तर्राष्ट्रिय महिला च्याम्पियनसिपमा नेपालले कीर्गिस्तानविरुद्ध पहिलो हाफमा १–० को अग्रता बनाएको छ ।

सोमबार त्रिपुरेश्वरस्थित दशरथ रंगशालामा जारी खेलको पहिलो हाफमा नेपालकी विमला चौधरीले गोल गरेकी हुन् । विमलाले १०औँ मिनेटमा हेडर गोल गर्दै घरेलु समर्थकमाझ आफ्नो टोलीलाई अग्रतामा राखेकी थिइन् । राइट साइडबाट सविता रानामगरले निकालेको क्रसमा बक्सभित्र अनमार्क रहेकी विमलाले सहजै हेडर गोल गरिन् ।

पहिलो हाफको अधिकांश समय बलमाथि नियन्त्रण बनाएको नेपालले करिब आधा दर्जन अवसरको सदुपयोग गर्न सकेन ।

आजदेखि सुरु भएको प्रतियोगितामा नेपाल र कीर्गिस्तानसँगै म्यानमार र लेबनानको सहभागिता छ । यसअघि आजै भएको पहिलो खेलमा म्यानमारले लेबनानविरुद्ध ३–१ को जित निकालेको थियो ।