काठमाडौं । नेपालले ‘नेपाल–जापान सेवा आदान–प्रदान कार्यक्रम’अन्तर्गत २० हजार ‘केयर गिभर’ जापान पठाउने भएको छ । त्यसका निम्ति मंगलबार नेपाल र जापानका सम्बन्धित कम्पनी तथा निकायहरूबीच सम्झौतापत्रमा हस्ताक्षर भएको छ ।

नेपालका तर्फबाट सन्दिपनी ग्रुप अफ एजुकेसनले जापान पठाउने प्रक्रिया अघि बढाउनेछ । जापानका तर्फबाट जेन्काउ रिसर्च इन्स्टिच्युट, कोजाइ कोसन कर्पोरेसन प्रोग्रेसिभ स्टाफ एजेन्सी र नेपालका तर्फबाट काठमाडौं विश्वविद्यालय स्कुल अफ मेडिकल साइन्स र सन्दिपनी ग्रुप अफ एजुकेसनका प्रतिनिधिहरूले समझदारीपत्रमा हस्ताक्षर गरेका छन् । 

सन्दिपनी ग्रुप अफ कम्पनीका कार्यकारी निर्देशक नरेश ओझाका अनुसार, १८ वर्षदेखि ४५ वर्षसम्मका नेपाली नागरिक केयर गिभरका रूपमा जान पाउनेछन् । त्यसका निम्ति स्वास्थ्यकर्मी नै हुनुपर्ने अनिवार्य छैन । 

उनीहरूले जापानी भाषाको आधारभूत ज्ञान ‘एन–फोर लेभल’को भाषा परीक्षा उत्तीर्ण गरेको हुनुपर्छ । जापानमा केयर गिभिङका निम्ति आवश्यक तालिमसमेत लिएको हुनुपर्छ । भाषा र सिप परीक्षणपछि अन्तर्वार्तामार्फत उनीहरूलाई छनोट गरिनेछ ।

आवश्यक सिप, प्रविधिलगायत तालिम कम्पनीले नै प्रदान गर्नेछ । यसको सम्पूर्ण खर्च कम्पनीले बेहोर्नेछन् । यी सबै प्रक्रिया पूरा गरी छनोट भएकाहरूलाई जापानी कम्पनी पीएसएस खाइगोले विभिन्न स्थानमा रोजगारी दिनेछ । 

यसरी जापान पुग्ने जनशक्तिले त्यहाँ तीनदेखि पाँच वर्षसम्म रोजगारी पाउनेछन् । उनीहरूले मासिक दुई लाखसम्म जापानी येन पारिश्रमिक पाउने सन्दिपनीले जनाएको छ । 

यसअघि, श्रम रोजगार तथा सामाजिक सुरक्षा मन्त्रालयले जी–टू–जी (सरकार–सरकार) प्रक्रियाबाट २०२४ मार्चदेखि फेब्रुअरीसम्म ४२ जना स्टाफ नर्स बेलायत पठाएको थियो ।

मन्त्रालयले पाइलट कार्यक्रमको रूपमा पहिलो चरणमा नेपालले १०० जना नर्स पठाउने योजना बनाएको थियो । तर, मापदण्डका आधारमा ४२ जना नर्समात्रै छनोट भएका थिए । उनीहरू हाल बेलायतको नेसनल हेल्थ सर्भिस (एनएचएस) अन्तर्गत रहेर सेवा दिइरहेका छन् ।