काठमाडौं । ३८औँ बंगलादेश एमेच्योर गल्फ च्याम्पियनसिपमा ऐतिहासिक उपाधि विजेता नेपाल नम्बर एक एमेच्योर गल्फर सदभाव आचार्य र राहुल विश्वकर्मा सम्मानित भएका छन् ।  नेपाल गल्फ संघले सदभाव र राहुललाई नगदसहित सम्मान गरेको हो । 

राष्ट्रिय खेलकुद परिषद् (राखेप) सदस्य–सचिव टंकलाल घिसिङले सम्मान गरे । घिसिङले व्यक्तिगततर्फ स्वर्ण विजेता सदभावलाई नगद ५० हजार प्रदान गरी सम्मान गरे । सदभाव यो उपाधि जित्ने पहिलो नेपाली खेलाडी हुन् । बंगलादेशका शफिकुल इस्लम र मोहम्मद शाहबुद्दिनलाई ५ स्ट्रोकले हराउँदै सदभावले उपाधि जितेका थिए ।

सदभावले राहुलसँग मिलेर टिमतर्फको उपाधि पनि जिते । टिममा स्वर्ण जितेका सदभाव र राहुललाई जनही २५–२५ हजारसहित सम्मान गरिएको छ । सदभावले कुल ७५ हजार प्राप्त गरे ।

यसअघि सन् २०१८ मा शुक्रबहादुर राई र टंकबहादुर कार्कीले तथा सन् २०२२ मा सुवास तामाङ र सदभाव आचार्यले टिम तर्फ स्वर्ण जितेका थिए ।

चारदिने च्याम्पियनसिपमा नेपालसहित बंगलादेश, श्रीलंका, पाकिस्तान, भुटान, दक्षिण कोरिया, जापान र आस्ट्रेलिया गरी ८ देशका कुल १०० खेलाडीले प्रतिस्पर्धा गरेका थिए ।