काठमाडौं । नेपाली राष्ट्रिय क्रिकेट टिमका मुख्य प्रशिक्षक मोन्टी देसाईले जिम्मेवारीमा निरन्तरता नपाउने भएका छन् । नेपाल क्रिकेट संघ (क्यान)ले शनिबार विज्ञप्ति जारी गर्दै प्रशिक्षक देसाईसँगको सम्झौतालाई नवीकरण नगर्ने निर्णय भएको जनाएको छ ।

“नेपाली राष्ट्रिय क्रिकेट टिमको मुख्य प्रशिक्षकमा श्री म्रुगंग जगदीश देसाई ‘मोन्टी देसाई’लाई दुई वर्ष कार्यकाल रहने गरी नियुक्त गरिएकोमा निजको सम्झौता सकिएको अवगत नै छ । साथै, नेपाल क्रिकेट संघले उक्त सम्झौता नवीकरण नगर्ने निर्णय गरेको व्यहोरा समेत सम्पूर्णमा जानकारी गराउन चाहन्छौँ,” क्यानले जारी गरेको विज्ञप्तिमा उल्लेख छ ।

देसाई दुईवर्षे सम्झौतासहित नेपाली टिमको मुख्य प्रशिक्षकमा नियुक्त भएका थिए । आईसीसी विश्वकप लिग–२ २०१९–२३ को अन्तिम १२ खेल बाँकी हुँदा देसाई नेपाली टिमको मुख्य प्रशिक्षकमा नियुक्त भएका थिए । देसाईको आगमनपछि नेपाली टिमले यो प्रतियोगिताका १२ मध्ये ११ खेल जित्दै एकदिवसीय विश्वकप छनोटमा सोझै स्थान बनाएको थियो ।

देसाईकै प्रशिक्षणमा नेपालले सन् २०२३ को एसिया कपमा प्रतिस्पर्धा गरेको थियो । यस्तै, घरेलु मैदानमै भएको एसीसी प्रिमियर कपको उपाधि जित्दै नेपालले १० वर्षपछि ट्वान्टी–२० विश्वकपमा स्थान निश्चित गरेको थियो ।