काठमाडौं । फ्रेन्चाइज टिमको अवधारणमा पहिलोपल्ट आयोजित नेपाल कबड्डी लिग (एनकेएल)को उपाधि जनकपुर नाइट्सले जितेको छ ।

त्रिपुरेश्वरस्थित राष्ट्रिय खेलकुद परिषद्को कभर्डहलमा शुक्रबार भएको फाइनल खेलमा जनकपुरले काठमाण्डू माभरिक्सलाई ४५–४१ ले पराजित गर्दै उपाधिमाथि कब्जा जमाएको हो ।

यसअघि जनकपुर २३ अंकसहित लिग चरणमा शीर्षस्थानमा रहँदै क्वालिफायरमा पुगेको थियो । उसले लिग चरणमा चार खेल जित्दा काठमाण्डूसँग बराबरी खेलेको थियो । पहिलो क्वालिफायरमा विराटनगर ब्यान्डिट्सलाई ३४–३२ ले हराउँदै फाइनलमा पुगेको थियो ।

उपाधिसँगै जनकपुरले पाँच लाख प्राप्त गरेको छभने दोस्रो स्थानमा चित्त बुझाएको काठमाण्डूले रू दुई लाख प्राप्त गरेको छ । पहिलोपटक भएको फ्रेन्चाइज कबड्डी लिगमा कुल ६ टिमको सहभागिता रहेको थियो ।