काठमाडौं । सहिद गंगालाल श्रेष्ठको सम्झनामा बुधबार काठमाडौंमा एक कार्यक्रम आयोजना गरियो । सहिद गंगालाल फाउन्डेसन (एसजीएलएफ) नेपालले सहिद दिवसको अवसरमा काठमाडौंमा ‘क्रियटिभ होराइजन’ कार्यक्रमको आयोजना गरेको हो ।

फाउन्डेसनले ‘क्रिएटिभ होराइजन’ कार्यक्रममार्फत काठमाडौं उपत्यकाका विद्यालयका विद्यार्थीहरू माझ कला, निबन्ध, कविता र वक्तित्वकला विधामा प्रतिस्पर्धा गराएको थियो ।

कार्यक्रममा कला, निबन्ध, कविता र वक्तित्वकला प्रतियोगिताका हरेका विधामा पहिलो, द्वितीय र तृतिय हुने विद्यार्थीलाई सम्मानित गरिएको थियो । प्रतियोगितामा १५ भन्दा बढी विद्यालयका एक सयभन्दा बढी विद्यार्थी सहभागी भएका थिए ।

कार्यक्रममा खोप कलेजका विद्यार्थीले सहिद गंगालाल श्रेष्ठको जीवनीसँग सम्बन्धित ‘गंगालालको चिता’ नाटक देखाएका थिए । नाटकले सहिद गंगालालको जीवन र बलिदानको चित्रण गरेको थियो ।

कार्यक्रममा स्थलमा विद्यार्थीले कोरेका शीर्ष १० चित्रहरू प्रदर्शनमा राखिएको थियो । कार्यक्रममा एक जर्नलको विमोचन गरिएको थियो । कार्यक्रममा पाराओलम्पिकमा कास्य पदक विजेत पलेशा गोवर्धनलाई पनि सम्मानित गरिएको थियो ।

नेपालका शहीदहरूको विरासतलाई संरक्षण गर्दै देशभक्तिलाई प्रेरित गर्ने, सांस्कृतिक जागरूकता बढाउने र युवाहरूलाई सशक्त बनाउने लक्ष्यका साथ कार्यक्रमको आयोजना गरिएको आयोजकले बताए ।

“राणा शासकले गंगालालको ज्यान लिएका थिए । राणा शासन हुकुमी शासन थियो । राणाको अवशेष अहिले पनि छ, परिवारवाद छ,” कार्यक्रमका प्रमुख अतिथि जगमान गुरुङले भने, “क्रान्ति अझै गर्नुपर्छ किनकी पारिवारिक शासन गएको छैन । क्रान्ति अझै सकिएको छैन, छाडातन्त्र बाँकी नै छ ।”

कार्यक्रममा फाउन्डेसनका महासचिव सूर्यद्विप श्रेष्ठले सहिदको सपनालाई सपनामा मात्र सीमित गर्न नुहने बताए ।