काठमाडौं । चीनको नयाँ ऊर्जा गाडी निर्माण गर्ने अग्रणी कम्पनी बीवाईडीले ‘बीवाईडी सेन्जेन’ सार्वजनिक गरेको छ । यो संसारकै ठूलो रोल–अन/रोल–अफ कार क्यारियर भएको बताइएको छ । यस जहाजको नौ हजार २०० गाडी बोक्न सक्ने क्षमता रहेको बताइएको छ ।

चीनको जियाङ्सु प्रान्तको याङझाउमा निर्माण सम्पन्न भएर हालै पानीमा उतारिएको यो २१९ मिटर लामो र ३७.७ मिटर चौडा जहाज एलएनजी डुअल–फ्युल प्रविधि, बीवाईडीका अत्याधुनिक ब्याट्री प्याक र साफ्ट जेनेरेटरद्वारा सञ्चालित छ ।

यी प्रविधिले ‘बीवाईडी सेन्जेन’लाई संसारकै सबैभन्दा वातावरणमैत्री र कुशल कार क्यारियर बनाएको कम्पनीले जनाएको छ ।

बीवाईडीले २०२६ सम्म आफ्नो जहाज संख्या आठ पुर्‍याउने योजना बनाएको जानकारी गराइएको छ । जसले बढ्दो विश्वव्यापी माग पूरा गर्न सहयोग पुर्‍याउनेछ ।

२०२४ मा बीवाईडीले चार लाख १७ हजारभन्दा धेरै विद्युतीय गाडी विदेश पठाएको बताइएको छ । जुन अघिल्लो वर्षभन्दा ७२ प्रतिशतले बढी हो ।