काठमाडौं । राष्ट्रिय स्वतन्त्र पार्टी (रास्वपा)ले वरिष्ठ अधिवक्ता दिनेश त्रिपाठीमाथि आक्रमण गरी पक्राउ परेका मध्ये महेन्द्र पाण्डे भनिने महानन्द जैसी मात्र आफ्नो सदस्य भएको जनाएको छ । ललितकुमार केसी र शीतल उर्फ सीता राई भने पार्टी सदस्य नभएको रास्वपाले स्पष्ट पारेको छ ।

रास्वपाका कार्यवाहक महामन्त्री कविन्द्र बुर्लाकोटीले आक्रमणमा संलग्न भएको प्रमाणित भए तत्काल पार्टीले कारबाही गर्ने बताए । महेन्द्र भनिने महानन्द घटनास्थलमा उपस्थित भए पनि आक्रमणमा संलग्न नभएको उनले जिकिर गरे । त्यही कारण उनलाई पार्टीको कारबाही नगरिएको बुर्लाकोटीले बाह्रखरीलाई जानकारी दिए ।

पक्राउ परेका महानन्द रास्वपा हुम्लाको संस्थापक उपसभापति हुन् । रास्वपाको संगठन विस्तार नहुँदै स्वस्फूर्त घोषणा गरिएको रास्वपा जिल्ला कार्यसमितिमा महानन्द उपसभापति थिए । हाल उनी रास्वपाका सक्रिय सदस्य हुन् ।

पछिल्लो समय उनी रास्वपा केन्द्रीय कार्यालयमा नियमित आउनेजाने गरेका थिए । सभापति रवि लामिछानेविरुद्ध कसैले तर्क गरेमा उनी आक्रामक हुने गरेको रास्वपा नेताहरूको भनाइ छ ।

बुर्लाकोटीका अनुसार, पक्राउ परेका अर्का व्यक्ति दोलखाको तामाकोसी गाउँपालिका–१ का ४८ वर्षीय ललितकुमार केसीले रास्वपा सदस्यताका निम्ति आवेदन दिएका छन् । तर, उनको सदस्यता पार्टीले स्वीकृत गरेको छैन ।

झापाकी सीतादेवी राई भने रास्वपाको सदस्य नभएको बुर्लाकोटीले जानकारी दिए ।

काठमाडौंको कालीमाटीस्थित स्वर्णलक्ष्मी सहकारी ठगीमा लामिछानेविरुद्धको मुद्दामा जाहेरवाला (सहकारीपीडित)का तर्फबाट बहस गरेका वरिष्ठ अधिवक्ता त्रिपाठीमाथि आक्रमण गरिएको थियो । यही माघ २ गते गरिएको आक्रमणविरुद्ध त्रिपाठीले प्रहरीमा उजुरी दिएपछि अनुसन्धान जारी छ ।

अनुसन्धानका क्रममा प्रहरीले तीनजनालाई पक्राउ गरेको छ । उनीहरूविरुद्ध मुद्दा चलाउने/नचलाउने निर्णय भइसकेको छैन ।

रास्वपाले आक्रमणमा संलग्न व्यक्ति पार्टीको सदस्य भए कारबाही गर्ने भनेर त्यसै दिन विज्ञप्ति जारी गरेको थियो । पार्टीको अनुसन्धान आयोगको समेत ध्यानाकर्षण भएको भन्दै रास्वपाले दोषी देखिएकालाई तत्काल कारबाही गर्ने भनेको थियो ।

अनुसन्धान आयोगका अध्यक्ष भरत देवकोटाका अनुसार, दोषी किटानीका निम्ति आयोगले अझसम्म अनुसन्धान गरिसकेको छैन । अनुसन्धानबाट ठहर भएबमोजिम कारबाहीको प्रक्रिया अघि बढाइने उनले जानकारी दिए ।