काठमाडौं । आईसीसी यू–१९ महिला विश्वकपमा नेपाली राष्ट्रिय टिमले आफ्नो अन्तिम खेलमा जित निकालेको छ । शुक्रबार मलेसियाको जोहोरस्थित जोहोर क्रिकेट एकेडेमीमा भएको खेलमा नेपालले घरेलु टिमविरुद्ध सात विकेटको जित निकालेको हो ।

नेपालले चौथो स्थानको प्लेअफमा मलेसियाले दिएको ४६ रनको सामान्य लक्ष्य ११ ओभरमा तीन विकेट गुमाएर पूरा गर्‍यो । नेपालको जितमा कप्तान पूजा महतोले अलराउन्डर प्रदर्शन गरिन् । बलिङतर्फ चार विकेट लिएकी पूजाले ब्याटिङमा अविजित २३ रन बनाइन् । उनले ३२ बलमा चार चौका प्रहार गरिन् ।

ज्योत्स्निका मरासिनीले सात, सिमाना केसीले चार, सावित्री धामीले तीन र साना प्रविनले एक रन थपे । 

मलेसियाकी मार्स्याले तीन विकेट लिइन् ।

त्यसअघि, टस हारेर ब्याटिङमा उत्रिएको मलेसियाले १६.५ ओभरमा सबै विकेट गुमाउनुअघि ४५ रन बनाएको थियो । मलेसियाकी नुरिमनले सर्वाधिक १५ रन जोडिन् । अरू ब्याटर दोहोरो अंकसम्म पुग्न सकेनन् ।

मलेसियालाई सस्तैमा रोक्न नेपालकी कप्तान पूजाले चार विकेट लिइन् । पूजाले ३.५ ओभरमा ना रन मात्र खर्चिइन् । उनको इकोनोमी रेट तीनभन्दा तल रह्यो । 

रचना चौधरीले तीन विकेट लिइन् । तीन ओभर बलिङ गरेकी रचनाले एक मेडन फ्याँक्दै पाँच रन मात्र खर्चिइन् । रचनाको इकोनोमी रेट दुईभन्दा तल रह्यो । रिया शर्मा र सिमाना केसीले समान एक विकेट लिए ।

पहिलोपटक विश्वकपमा छनोट भएको नेपाल समूह चरणका सबै खेलमा पराजित भएको थियो । समूह ‘डी’मा रहेको नेपाल बंगलादेशसँग पाँच विकेट, दोस्रो खेलमा स्कटल्यान्डसँग एक विकेट र तेस्रो खेलमा अस्ट्रेलियासँग ८३ रनले पराजित भएको थियो ।