काठमाडौं । नेपाल विद्युत् प्राधिकरणले औद्योगिक प्रतिष्ठानमा केहि घण्टा विद्युत् कटौती गर्ने तयारी गरेको छ । सुख्खा सिजन (पुसदेखि चैतसम्म) विद्युत्को बढी माग हुने र मागअनुसार उपलब्ध गराउन नसकिने भएकाले केही घण्टा औद्योगिक प्रतिष्ठानमा विद्युत् कटौती गर्नुपर्ने अवस्था रहेको प्राधिकरणले जनाएको छ ।
प्राधिकरणका प्रवक्ता प्रबल अधिकारीले ग्राहकलाई लोडसेडिङ हुन नदिन ठूला उद्योगमा करिब ३ घण्टा विद्युत् कटौती गर्ने तयारी गरिरहेको जानकारी दिए । “प्राधिकरण लोडसेडिङ घटाउन लागिपरेको छ,” उनले भने, “यद्यपि अहिलेसम्म स्वदेशी जलविद्युत्बाट मुलुक आत्मनिर्भर भने हुन सकेको छैन ।”
उनका अनुसार सुख्खा याममा मुलुकमा करिब १३ सय ८० मेगावाट विद्युत् आवश्यकता छ । तर, मुलुकका जलविद्युत् आयोजनाबाट जलप्रवाह घट्दै जाने भएकाले उत्पादन घट्दै जान्छ ।
“प्राधिकरणसँग ४२० मेगावट विद्युत् उपलब्ध छ,” उनले थपे, “निजी क्षेत्रले १६० मेगावाट उत्पादन गर्छ ।” अहिले भारतबाट ३९२ मेगावाट विद्युत् आयात भइरहेको छ । त्यसलाई बढाएर ४७० मेगावाटसम्म पुर्याउने पहल भइरहेको प्राधिकरणले जनाएको छ ।
सुख्खा समयमा बढी मात्रामा बेलुका ६ देखि ९ बजेसम्म र बिहान ६ देखि ९ बजेसम्म विद्युत् खपत हुने गरेको छ ।