काठमाडौं । संसद्को सार्वजनिक लेखा समितिको बैठक बोलाइएको छ । समितिका सभापति ऋषिकेश पोखरेलले मंगलबार बिहान ११ बजे बस्ने गरी बैठक डाकेका हुन् ।

मंगलबारको बैठकका लागि ‘समितिमा प्राप्त उजुरीबारे छलफल गर्ने’ कार्यसूची तय भएको छ । समितिका सचिव एकराम गिरीका अनुसार, पछिल्लो समय सिमेन्टमा कार्टलिङ र पशुपतिमा मान्छे जलाउने पैसा नपाएको सहितका उजुरी समितिमा आएका छन् ।

यसअघि, समितिको बैठक चार महिनापछि गएको पुस ८ गते बसेको थियो । त्यसअघि, ०८१ भदौ ९ गते बसेको बैठकमा विद्युत् प्राधिकरणको डेडिकेटेड र ट्रंकलाइन विवादका विषयमा छलफल भएको थियो । समितिका सभापति पोखरेल प्राधिकरणका कार्यकारी निर्देशक कुलमान घिसिङले २२ अर्ब बक्यौतामा आठ अर्बको मात्र बिल जारी गरेको भन्दै कारबाही सिफारिस गर्ने पक्षमा उभिएका थिए । नेकपा (माओवादी केन्द्र)का सांसदहरूले घिसिङले ठिक काम गरेको भन्दै बचाउ गरेका थिए ।

सभापतिले एकतर्फीरूपमा निर्णय सुनाउँदै घिसिङलाई कारबाहीका लागि अख्तियार दुरुपयोग अनुसन्धान आयोगलाई दिर्नेशन दिने प्रस्ताव राखेपछि सत्तारूढ नेपाली कांग्रेस नै निर्णयको विरुद्धमा उभिएको थियो । त्यही कारण सभापति पोखरेल निर्णयमा रोकिन पुगेका थिए । त्यसपछि बैठक नै बोलाउन छाडेका पोखरेल आफैँ विवादमा तानिएका थिए ।

उनकी श्रीमती अञ्जला कोइराला सहकारी ठगीको विवादमा तानिएपछि श्रीमतीसँगै उनी पनि विवादित भएका थिए । लगत्तै उनका स्वकीय सचिव एमबीबीएस पढाइदिने भन्दै ३८ लाख रुपैयाँ उठाएको विवादमा पक्राउ परेपछि सभापिति पोखरेल माथि थप प्रश्न उठेको छ ।

संसद्‌मा सरकारको बेरुजुसहितका विषयमा प्रश्न उठाउने समिति सभापतिमा सरकारको नेतृत्व गरिरहेको दलका सांसद सभापति रहँदा यसै पनि प्रश्न उठिरहेको अवस्था छ । यस्तो बेला समितिको बैठक नै कम बस्दा संसद्को कार्यकारीका विषयमा, निगरानीको भूमिका नै कमजोर बनेको भन्दै प्रश्न उठिरहेको छ ।