काठमाडौं । आईसीसी यू–१९ ट्वान्टी–२० महिला विश्वकपमा शनिबार नेपाल बंगलादेशसित पाँच विकेटले पराजित भयो । नेपाली महिला क्रिकेट इतिहासमा विश्वकप खेलेको यो पहिलो टिम हो ।

पहिलो खेलमा टस हारेर ब्याटिङमा उत्रिएको नेपालले १८.२ ओभरमा अलआउट हुनुअघि ५२ रन बनाएको थियो । मलेसियाको बांगीस्थित मैदानमा ओपनर साना प्रविनले ३२ बलमा १९ रन जोडिन् । सिमाना केसीले १० बनाइन् । अरू नेपाली खेलाडीले दोहोरो अंकमा रन जोड्न सकेनन् ।

कप्तान पूजा महतो दुई रनमा आउट भइन् । अलिशा यादवले चार रन बनाइन् । तिर्सना विक र रचना चौधरीले समान तीन/तीन रन बनाए । रिया शर्मा पाँच रनमा अविजित रहिन् । नेपालले अतिरिक्त चार रन पाएको थियो ।

बंगलादेशकी जनाथन माओलाले दुई विकेट लिइन् । अनिसा सोवा, फोयोमोदी चोया र निशीता अख्तरले समान एक/एक विकेट लिए ।

५३ रनको विजयी लक्ष्य बंगलादेशले १३.२ ओभरमा पाँच विकेट गुमाएर पूरा गर्‍यो । बंगलादेशका निम्ति सादिया इस्लामले १६ रन बनाइन् । सुमैया अत्तरले १२ र अफिया अशिमा इराले नौ रन जोडे ।

बलिङतर्फ नेपालका रचना चौधरी, रिया शर्मा, सिमाना केसी र पूजा महतोले समान एक/एक विकेट लिए ।

नेपालले यही माघ ७ गते स्कटल्यान्डसँग आफ्नो दोस्रो खेल खेल्नेछ । नेपालले माघ ९ गते अस्ट्रेलियासँग प्रतिस्पर्धा गर्नेछ ।

नेपाल प्रतियोगिताको समूह ‘डी’मा छ । सुपर–६ मा पुग्न कम्तीमा एउटा खेल जित्नुपर्छ ।

प्रतियोगिताको यो संस्करणमा कुल १६ टिम सहभागी छन् ।

थप तस्बिर हेर्नोस्–