काठमाडौं । सभामुख देवराज घिमिरेले संसदीय प्रणालीभित्र दलहरूको भूमिका प्रमुख हुने बताएका छन् । आइतबार काठमाडौंमा आयोजित एक कार्यक्रममा सभामुख घिमिरेले दलीय प्रणालीमा आधारित लोकतान्त्रिक संसदीय प्रणालीभित्र दलको भूमिका प्रमुख हुने बताए ।

"संसदीय परिपाटि त्यसमा पनि हाम्रो दलीय प्रणालीमा आधारित लोकतान्त्रिक संसदीय प्रणालीभित्र दलहरूको भूमिका सर्वप्रथम माथि रहन पुग्छ । त्यति मात्र होइन, दलहरू नै यो व्यवस्थालाई प्रभावकारी ढंगबाट स्थापित गर्ने र दलको भूमिकामार्फत नै यसलाई प्रवर्धन गर्दै अघि जाने कुराहरू हुन्छन्," घिमिरेले भने ।

जनताका अभिमत उठाएर एउटा परिणाम दिने साधक नै राजनीतिक दल भएको उनको भनाइ छ । उनले लोकतान्त्रिक विधिअनुसार नबनेको राजनीतिक दलहरूमाथि प्रश्न उठ्नु स्वाभाविक भएको बताए ।

"दल आफैँ यस्तो साधन हो । जो, आम जनतालाई ठिक दिशामा लैजान सक्छ र जनताका अभिमतहरूलाई ठिक ढंगबाट अभिव्यक्त गर्ने र त्यसलाई निर्णयमा पुर्‍याउने र परिणाम दिने कामको साधक बनेर जान सक्छ । तर, ऊ आफैँ लोकतान्त्रिक विधिअन्तर्गत बनेको छैन, उसको प्रणालीहरू लोकतान्त्रिक छैनन्, उसले सूचनासम्बन्धीको कामलाई व्यवस्थित गर्न आफूलाई नै त्यसरी व्यवस्थित गरेको छैन भने यसमाथि प्रश्न उठ्नु स्वाभाविक छ," उनले भने ।