पोखरा । कोरियाली अन्तर्राष्ट्रिय सहयोग नियोग (कोइका)को नौ मिलियन डलर सहयोगमा गण्डकीमा प्राविधिक शिक्षालय (जीआईटी) भवन निर्माण हुने भएको छ । शुक्रबार कोइकाका प्रतिनिधि र गण्डकी सरकारबीच सम्झौतापत्रमा हस्ताक्षर भएको छ । गण्डकीका सामाजिक विकास मन्त्रालयका सचिव राजेन्द्रदेव पाण्डे र नेपालस्थित कोइकाका देशीय निर्देशक मुहेओन कङले सम्झौतापत्रमा हस्ताक्षर गरे ।

आजै गण्डकीका मुख्यमन्त्री सुरेन्द्रराज पाण्डेले भवनको शिलान्यास गरेका छन् । स्याङ्जाको फेदीखोला गाउँपालिका–१ गुर्धुममा नेपाल सरकारले उपलब्ध गराएको १६० रोपनी जग्गामा शिक्षालयको भवन निर्माण गरिनेछ ।

शिलान्यासपछि मुख्यमन्त्री पाण्डेले कोइकाले एक अर्ब २३ करोड रुपैयाँ सहयोग गरेकामा कोरियाली सरकारलाई धन्यवाद दिए ।

प्राविधिक शिक्षामार्फत दक्ष तथा व्यवसायीक जनशक्ति तयार गर्ने उद्देश्यले गण्डकी सरकारले गण्डकी प्राविधिक शिक्षा तथा व्यवसायीक प्रतिष्ठान गठन गरेको हो ।

परियोजना कोइका र गण्डकी प्राविधिक शिक्षालय तथा व्यावसायिक तालिम प्रतिष्ठानले संयुक्तरूपमा कार्यान्वयन गर्नेछन् । परियोजना सन् २०३० सम्म (पाँच वर्ष) चल्नेछ ।