काठमाडौं । नेपाली कांग्रेसका नेता अर्जुननरसिंह केसीले भ्रष्टाचार काण्ड छानबिनका निम्ति पूर्वप्रधानन्यायाधीशको नेतृत्वमा शक्तिशाली समिति गठन गर्नुपर्ने प्रस्ताव गरेका छन् ।

शुक्रबार काठमाडौंमा आयोजित एक कार्यक्रममा उनले भ्रष्टाचार नियन्त्रणका लागि पाँच सय र एक हजार दरका नोट प्रतिबन्ध लगाउनुपर्ने तर्क गरे । 

दल विशेषका नेताले चिनेको व्यक्तिको नेतृत्वमा नभई पूर्वप्रधानन्यायाधीशको नेतृत्वमा छानबिन समिति गठन भएमा भ्रष्टाचार नियन्त्रणमा सहयोग पुग्ने उनले बताए । 

उनले भने, ‘‘नेपाली जनताले चिनेको, निष्पक्ष ढंगको न्याय दिनसक्ने पूर्वप्रधानन्यायाधीशको संयोजकत्वमा तीनदेखि पाँचजनासम्मको शक्तिशाली समिति गठनका लागि हामी सहमतिमा पुगौँ ।’’

पाँच सय र एक हजार दरका नोट प्रतिबन्ध लगाएमा सत्तामा पुगेको व्यक्तिले भ्रष्टाचार गरेर थुपारेको भनिएको रकम नियन्त्रणमा लिन सकिने उनले बताए । उनले भने, ‘पाँच सय र हजारका नोट ब्यान्ड गर्दिऊँ । हेरौँ कसले कति लुकाएको रहेछ, त्यो पनि जनताका अगाडि स्पष्ट भएर जाओस् ।’