काठमाडौं । भृकुटीमण्डपस्थित प्रदर्शनी हलमा प्राध्यापक डा. सुरेश ढकाल र गुरुङ सुशान्तले ‘संस्कृतिको मावनशास्त्र’माथि एक घण्टा छलफल गरे । त्यसपछि सोही मञ्चमा ‘नेपाली साहित्य लेखमा महिलाको उपस्थिति’को केस्रा केलाए डा. रजनी ढकाल, डा. ज्ञानु पाण्डे, कुमारी लामा र सुमन वर्षाले ।

लेखक, साहित्यकार, पाठक भेला हुने र छलफल गर्ने यो मौका जुराएको हो, दक्षिण एसियाली अन्तर्राष्ट्रिय पुस्तक मेलाले । दक्षिण एसियाली साहित्यमार्फत एकअर्काको संस्कृतिसँग जोडिने उदेश्य राखिएको पुस्तक मेलामा नेपाल, भारत र चीनका किताब उपलब्ध छन् ।

पुस्तक मेलामा नेपालका ११० गरी १६० वटा स्टल छन् । साहित्य, संस्कृति, इतिहास, अन्तर्राष्ट्रिय र बालबालिकाका किताबहरू मेलामा उपलब्ध छन् । पुस्तक मेलाको आयोजक नेपाल पुस्तक तथा स्टेशनरी व्यवसायी महासंघको राष्ट्रिय अध्यक्ष शिवसागर शर्माका अनुसार मेला २१ पुससम्म चल्नेछ ।

मेलामा चीनसम्बन्धी सामग्री पनि प्रशस्तै उपलब्ध छन् । चीनको ‘चाइना इन्टरनेशलन बुक ट्रेडिङ’ मेलाको सहआयोजक हो । पुस्तक मेलाको आधा हिस्सा चिनियाँ पुस्तकले ओगटेको छ । अमेरिकी दूतावासको ‘बुक बस’ पनि मेलामा राखिएको छ ।

पठन संस्कृति विकास गर्न र मान्छेहरूलाई किताबतर्फ आर्कषित गर्न मेला आयोजना गरिएको शर्मा बताउँछन् । “हाम्रो उदेश्य पठन संस्कृति विकास गर्नु हो । डिजिटल दुनियाँबाट एकछिन बाहिर निस्केर मानिसहरू किताब पढुन् भन्ने हाम्रो चाहना हो,” शर्मा भन्छन्, “लेखक, प्रकाशक र पाठकहरूबीच एउटै थलोमा अन्तर्क्रिया होस् भन्ने उदेश्यले यो मेला आयोजना गरेका हौँ ।”

यो पुस्तक मेलामा कपिराइट किनबेचको पनि व्यवस्था मिलाइएको शर्माले बताए । “विदेशी किताब नेपालीमा छाप्ने र नेपाली भाषाका किताब विदेशमा छाप्ने प्रक्रिया मिलाउन यसपटक यहाँ कपिराइट किनबेचको पनि व्यवस्था छ,” शर्माले भने ।

प्रकाशन गृह इन्डिगो इन्कका निर्देशक बिष्णुकुमार पौडेल पुस्तक मेलाहरूले प्रकाशक लेखक र पाठकबीच घनिष्टता बढाउने बताउँछन् । पौडेल भन्छन्, “यस्ता मेलाहरूले पठन संस्कृति फैलिन्छ । अनि लेखक, प्रकाशक र पाठकहरूबीच पनि अन्तर्क्रिया बढ्दा यसले घनिष्ठतासँगै हामी प्रकाशक, लेखक र पाठकको दायरा पनि बढाउँछ ।”