काठमाडौं । पोखराको सूर्यदर्शन सहकारी ठगी प्रकरणमा पक्राउ परेका राष्ट्रिय स्वतन्त्र पार्टीका सभापति रवि लामिछानेसहितका अभियुक्तहरूमाथि न्यायिक प्रक्रिया जारी छ । कास्की प्रहरीले लामिछाने, नेपाल प्रहरीका पूर्वडीआईजी छविलाल जोशीसहितका आरोपीलाई पक्राउ गरेर अनुसन्धान थालेको थियो । 

प्रहरीको अनुसन्धान प्रतिवेदनका आधारमा जिल्ला सरकारी वकिल कार्यालय कास्कीले पुस ७ गते मुद्दा कास्की अदालत पेश गरेको थियो । यसयता कास्की जिल्ला अदालतले सूर्यदर्शन सहकारी प्रकरणका अभियुक्तबारे न्यायिक प्रक्रिया थालेको हो । 

पक्राउ परेका सातजनाको बयान मंगलबार मात्रै सकिएको थियो । त्यही दिनदेखि थुनछेक बहस जारी छ । सम्भवतः अर्को साता अभियुक्तहरूलाई धरौटीमा  छाड्ने वा पुर्पक्षका निम्ति थुनामा पठाउने भन्ने आदेश हुनेछ । 

सूर्यदर्शन सहकारी प्रकरणमा अभियुक्तहरूमाथि सहकारी ठगी, संगठित अपराध र सम्पत्ति शुद्धीकरण गरी तीनवटा कसुर छ । तर, सूर्यदर्शन सहकारी ठगी प्रकरणको मुख्य केन्द्रबिन्दु रवि लामिछाने छन् ।  जसकारण कास्की अदालतले लामिछानेको हकमा के आदेश गर्ला भन्ने चासो धेरैको छ ।

लामिछानेविरुद्ध सहकारी ठगी प्रकरणमा तीन करोड ठगी तथा झण्डै २८ करोड रुपैयाँ सम्पत्ति शुद्धीकरण अभियोगमा मुद्दा चलिरहेको छ । सहकारी ठगीअन्र्तगत सूर्यदर्शन सहकारीबाट गोर्खा मिडियामा रकम आउँदा एक करोड कर्जा लामिछानेकै नाममा प्रहरीले फेला पारेको थियो ।

सहकारीको कर्जासम्बन्धी आन्तरिक फारममा लामिछानेको हस्ताक्षर भेटिएको थियो ।  त्यसलाई प्रहरीले प्रमाणका रूपमा समेत लिएको थियो ।  तर, प्रहरीको फरेन्सिक ल्याबको परीक्षणबाट भने उक्त हस्ताक्षर लामिछानेको नभएको पुष्टि भएको खुलेको छ ।

०७७ जेठ र असारमा सूर्यदर्शन सहकारीबाट गोर्खा मिडियाको ग्लोबल आइएमई बैंक खातामा जम्मा भएको एक करोड रुपैयाँ रवि लामिछानेको नाममा कर्जा देखाइएको थियो । 

तर, कर्जाको अन्तरिक फारममा रहेको हस्ताक्षर लामिछानेको नभएको पुष्टि भएको हो ।  प्रहरीका एक अधिकारीकाअनुसार पनि फरेन्सिक रिपोर्टअनुसार लामिछानेको कर्जा फारममा हस्ताक्षर मिलेको पाइएन ।  प्रहरीको फरेन्सिक ल्याबको रिपोर्टबारे बुधबारको थुनछेक बहसका क्रममा न्यायाधीशले चासो राखेको रविका सहयोगी प्रमोद न्यौपानेले बताए । 

जिल्ला प्रहरी कार्यालय कास्कीका प्रमुख एसपी श्यामबाबु ओलियाले भने प्रहरीले फरेन्सिक ल्याबको परीक्षणबाट आएको रिपोर्ट प्रतिवेदनमा नै समावेश गरेर पठाइएको बताए । उनले भने, ‘‘हामीले परीक्षणको रिपोर्ट अनुसन्धान प्रतिवेदनमा राखी वकिल कार्यालय बुझाएका हौँ । रिपोर्टमा के थियो भन्नेबारे सरकारी वकिल कार्यालय नै बुझ्नुहोला ।’’

सरकारी वकिल कार्यालयले तयार पारेको अभियोग पत्रमा समेत लामिछानेविरुद्ध समावेश कागजातहरूमध्ये फरेन्सिक ल्याबको परीक्षणपत्र समेत राखिएको उल्लेख गरेको छ ।

लामिछानेले सहकारी ठगी प्रकरणमा आफ्नो कुनै भूमिका नरहेको बयान प्रहरीदेखि जिल्ला अदालत कास्कीमा दिएका छन् । 

काठमाडौं प्रहरीले बुझायो अनुसन्धान प्रतिवेदन

रवि लामिछाने जोडिएको काठमाडौंको स्वर्णलक्ष्मी सहकारी ठगी प्रकरणको अनुसन्धान प्रतिवेदन काठमाडौं प्रहरीले आज बुझाएको छ । काठमाडौं प्रहरीले लामिछानेसहित ४४ जनालाई प्रतिवादी बनाउनुपर्ने रायसहितको अनुसन्धान प्रतिवेदन तयार पारेर अनुुसन्धान प्रतिवेदन बुझाएको हो । 

प्रहरीले अनुसन्धान प्रतिवेदन बिहीबार जिल्ला सरकारी वकिल कार्यालय काठमाडौँमा पेस गरेको काठमाडौं प्रहरीका एसपी नवराज अधिकारीले जानकारी दिए ।

४४ जना प्रतिवादीबाट प्रहरीले १ अर्ब १९ करोड ४९ लाख रुपैयाँ बिगो मागदावी लिनुपर्ने राय दिएको छ । स्वर्णलक्ष्मी सहकारीको रकम अपचलनमा संलग्न रविसहित जीबी राई, पूर्वडीआईजी छविलाल जोशी, दीपक लामा, कोषाध्यक्ष कुमार रम्तेल र व्यवस्थापक नवीन अछामीसहित ४४ जनालाई प्रतिवादी कायम गर्नुपर्ने राय प्रहरीले दिएको छ ।

कार्तिक २१ मा सहकारी लेखा समिति सदस्य सुनिता नेवा र कार्तिक २६ मा ऋण उपसमिति सदस्य कमल लामालाई पक्राउ गरी काठमाडौं प्रहरीले अनुसन्धान थालेको थियो । रवि र छविविरुद्ध हाल पोखरा जिल्ला अदालतमा थुनछेक बहस जारी छ ।

उनीहरूमाथि पोखराको सूर्यदर्शन सहकारीको रकम अपचलनबारे प्रहरीले पक्राउ गरी अनुसन्धान थालेको थियो । स्वर्णलक्ष्मीको रकम ठगी प्रकरणबारे बयान लिन पोखराबाट काठमाडौं ल्याइएको थियो ।