काठमाडौं । सामना बैंकिङ पुरस्कार गुठीले २०८१ सालको ‘सामना बैंकिङ पुरस्कार’ बैंकिङविज्ञ बीएन घर्तीलाई प्रदान गरेको छ । उनले लेखेको पुस्तक ‘बैकिङ अनुशासन दिगो विकासका लागि’ पुस्तकका लागि ७५ हजार रुपैयाँ राशीको उक्त पुरस्कार प्रदान गरिएको हो ।

उक्त पुस्तक बैंकिङ एन्ड इन्स्योरेन्सले प्रकाशन गरेको थियो । गत आइतबार उनलाई स्वास्थ्य तथा जनसंख्यामन्त्री प्रदीप पौडेलले सम्मान गर्दै पुरस्कार प्रदान गरेका हुन् । प्रा. डा. विश्वम्भर पोखरेल, प्रा.डा. गोविन्द नेपाल र बैंकर तथा साहित्यकार कृष्ण प्रधान रहेको मूल्यांकन समितिले उक्त पुरस्कार घर्तीलाई प्रदान गर्नका लागि सिफारिस गरेको थियो ।

नेपाल बंगलादेश बैंक, एनआईसी बैंक र किष्ट बैंकमा समेत काम गरेका घर्ती किष्ट बैंकको का.मु प्रमुख कार्यकारी अधिकृत समेत भएर कार्य गरेका थिए । किष्ट बैंक प्रभु बैंकमा गाभिएपछि स्वैच्छिक अवकाश लिएका घर्तीले बैंक तथा वित्तीय संस्थाका सञ्चालक समिति, उच्च व्यवस्थापन र अन्य कर्मचारीलाई तालिम दिने र नीति, कार्यविधि, रणनीतिक योजना आदि बनाउन परामर्श दिने कार्य गर्दै आएका छन् ।

उनको परामर्शमा केही वित्तीय संस्था समस्याग्रस्त अबस्थाबाट बाहिर फर्केका छन् र केही वित्तीय संस्था मर्जर प्राप्तिमा समेत गएका छन् ।