काठमाडौं । पूर्वमन्त्री हृदयेश त्रिपाठी नेतृत्वको जनता प्रगतिशील पार्टी नेपालले तराई–मधेस केन्द्रित राजनीतिक दलहरूबीच सहकार्यका लागि पहल थालेको छ । 

सो पार्टीले तराई–मधेस केन्द्रित दलहरूसँग सहकार्यका लागि वरिष्ठ उपाध्यक्ष डा. शिवजी यादवको संयोजकत्वमा तीन सदस्यीय वार्ता टोली गठन गरेको छ। जसमा ईश्वरदयाल मिश्र र मोहम्मद साबिर हुसेन सदस्य छन्।

आइतबार पार्टी अध्यक्ष हृदयेश त्रिपाठीसहित वरिष्ठ उपाध्यक्ष डा.शिवजी यादव र पूर्वमन्त्री ईश्वरदयाल मिश्रले  जनता समाजवादी पार्टी नेपालका नेता राजकिशोर यादवसँग भेटवार्ता गरे । भेटमा संविधान संशोधन र नेपालको वर्तमान राजनतिक अवस्थाबारे छलफल भएको बुझिएको छ । 

दुई दलबीच साझा एजेण्डासहित एकीकृत शक्ति निर्माणका लागि छलफल भएको हो । जनता प्रगतिशील पार्टीको उक्त प्रस्तावप्रति जसपा नेपाल पनि सकारात्मक रहेको बताइएको छ । 

कम्युनिस्ट पार्टीबाट राजनीति सुरु गरेका त्रिपाठी नेपाल सद्‍‌भावना पार्टी, तराई मधेस लोकतान्त्रिक पार्टी हुँदै जनता प्रगतिशील पार्टीसम्म आइपुगेका हुन् । तराई मधेश लोकतान्त्रिक पार्टीबाट अलग भएपछिको केही वर्षपछि उनले ०७८ मंसिरमा नयाँ पार्टी खोलेका हुन् । 

०७४ सालको निर्वाचनमा एमालेको सूर्य चिह्न लिएर उनी सांसदमा विजयी बनेका थिए । त्यसलगत्तै बनेको एमाले अध्यक्ष केपी शर्मा ओली नेतृत्वको सरकारमा उनी लामो समयसम्म मन्त्री बनेका थिए । 

०७९ को निर्वाचनमा भने उनी नवलपरासी पश्चिम क्षेत्र नं १ मा नेपाली कांग्रेसका उम्मेदवार विनोदकुमार चौधरीसँग पराजित भएका थिए । त्यसयता निष्क्रियजस्तै देखिएका त्रिपाठी संविधान संशेधनको मुद्दालाई बोकेर पुनः राजनीतिक वर्चस्व फर्काउन प्रयासरत छन् ।