कास्की । आज आइतबारदेखि पोखरामा दोस्रो संस्करणको ‘नेपाल–चीन मैत्रीपूर्ण ड्रागन बोट रेस फेस्टिभल’ सुरु हुँने भएको छ । नेपाल र छिमेकी मुलुक चीनबीचको सम्बन्ध सुमधुर बनाउँदै नेपालको पर्यटन प्रवर्द्धन गर्ने उद्देश्यले फेस्टिभल आयोजना गरिएको हो । 

यही पुस १५ गतेसम्म सञ्चालन हुने उक्त फेष्टिभलमा नेपाल, चीन र सिंगापुरका खेलाडी सहभागी हुनेछन् । फेष्टिभल पोखराको प्रमुख पर्यटकीय गन्तव्य फेवातालमा हुनेछ । 

उक्त प्रतियोगितामा २० टोली सहभागी हुनेछन् । गण्डकी प्रदेश सरकार, पोखरा महानगरपालिका, नेपालस्थित चिनियाँ दूतावास र नेपाल पर्यटन बोर्डको संयुक्त आयोजनामा फेस्टिभल हुन लागेको हो । 

आयोजक पोखरा महानगरका प्रमुख धनराज आचार्यका अनुसार प्रतियोगितामा सहभागिताका लागि चीनको छेन्दुबाट विमान चार्टर गरी एक सय २९ खेलाडी यही पुस ११ गते पोखरा आएका थिए । प्रतियोगिताको सम्पूर्ण तयारी पूरा भएको उनले बताए । 

प्रतियोगितामा नेपालका ११ टोली, चीनका आठ र सिंगापुरको एक टोली सहभागी हुनेछ । गण्डकी, बागमती, कर्णाली, त्रिभुवन आर्मी क्लब, ड्रागन बोर्ट गण्डकी, बेगनास टोली, रुपाताल टोली र नेपाल र्याफ्टिङ एजेन्सिज एसोसिएसन (नारा)सहित नेपालका ११ टोलीले प्रतियोगितामा भाग लिनेछन् । 

प्रतियोगितामा पाँच सय र दुई सय मिटर दौड हुनेछन् । प्रमुख विजेता टोलीले पाँच हजार अमेरिकी डलर, उपविजेताले दुई हजार डलर र तृतीय हुने टोलीले एक हजार दुई सय अमेरिकी डलर पाउने आयोजले जनाएको छ । रासस