टोकियो । साना चारपांग्रे सवारीसाधनका लागि ख्याति कमाएका विशेषज्ञ ओसामु सुजुकीको बुधबार निधन भएको छ । उनी ९४ वर्षका थिए । 

कम्पनीले शुक्रबार एक विज्ञप्ति जारी गरी सुजुकी मोटरलाई विशेषगरी भारतमा ठूलो सफलता हासिल गराउने र अन्तर्राष्ट्रिय ब्राण्डका रूपमा विकास गर्न सफल सुजुकीको निधनको पुष्टि गरेकोे छ ।

सफल व्यवसायीको चार दशक लामो नेतृत्वपछि सन् २०२१ मा अवकाश लिएका सुजुकीको कार्यकालमा कम्पनीको बिक्री १० गुणाभन्दा बढीले वृद्धि भएको थियो ।

सन् १९३० जनवरी ३० मा मध्य जापानी क्षेत्र गिफुमा जन्मिएका उनले फर्मको संस्थापकको परिवारमा विवाह गरेका थिए भने पछि सन् १९७८ मा यसको अध्यक्ष बनेका थिए । 

आफूलाई ‘सानो व्यवसायमा बूढो मानिस’ भन्न रुचाउने उनले हल्का वजनको ‘केई’ सवारी साधन निर्माण गर्नमा ध्यान केन्द्रित गरे । ती सवारी साधनमध्ये धेरै उनीहरूको इन्धन दक्षता र चलाउनका लागि सजिलो भएका कारण प्रसिद्ध थिए ।

कार निर्माता कम्पनी सुजुकीले कुनै समय जनरल मोटर्स र फक्सवागनसँग सहकार्यका लागि सम्झौता गरेको थियो र सन् २०१९ मा टोयोटासँग पनि पुँजी परिचालनसम्बन्धी गठबन्धन गरेको थियो।

सन् २०२१ मा सुजुकीले कम्पनीको अध्यक्ष पदबाट अवकाश लिँदा कम्पनीको बिक्री ३.१८ ट्रिलियन येन (२० अर्ब अमेरिकी डलर) पुगेको थियो ।

सन् १९७८ मा उनले कम्पनीको कार्यभार सम्हाल्दा कम्पनीको बिक्री ३२३ अर्ब येन थियो ।रासस