काठमाडौं । नेपाल प्रिमियर लिग (एनपीएल)को टोली जनकपुर बोल्ट्सका अलराउन्डर जिम्मी निसमले अर्को वर्ष पनि नेपाल आउन सक्ने बताएका छन् । न्युजिल्यान्ड अलराउन्डर निसम हाल एनपीएलमा जनकपुरको प्रतिनिधित्व गरिरहेका छन् ।

जनकपुरको फाइनल यात्रासम्म प्रभावशाली प्रदर्शन गरिरहेका निसमले बिहीबार दोस्रो क्वालिफायरमा कर्णाली याक्सविरुद्ध जित निकालेपछि आगामी वर्ष पनि नेपाल आउने चाहना राखेका हुन् । खेलमा जनकपुरले कर्णालीविरुद्ध दुई विकेटको जित निकाल्दा ४५ रन बनाएका निसम नै ‘प्लेयर अफ दी म्याच’ चुनिएका थिए ।

“धेरै रमाइरहेको छु । राति केही चिसो हुन्छ, जुन मैले आशा गरेको थिइनँ । मैदान बाहिरको आतिथ्यता निकै राम्रो छ । केही राउन्ड गल्फ पनि खेलेँ । खेलमा धेरै रमाइरहेको छु, त्यसैगरी मैदान बाहिर पनि । आशा छ, अर्को वर्ष पनि आउने छु,” निसमले भने ।

उनले जनकपुरको लक्ष्य उपाधि भएको हुँदा उपाधि नजितेसम्म आफ्नो प्रदर्शनले अर्थ नराख्नेसमेत बताए ।

“एकदमै राम्रो उत्साहित खेल थियो । सायद हामी फाइनलका निम्ति योग्य थियौँ । समर्थक सुखी साथ घर जान पाए । हामी एकदमै राम्रो टिम बनेका छौँ । मैले ५० रन बनाए पनि वा शून्यमा आउट भए पनि उपाधि नजितेसम्म त्यसले अर्थ राख्दैन । त्यसैकारण उपाधि नै मुख्य लक्ष्य हो,” निसमले थपे ।

कर्णालीविरुद्ध जितसँगै फाइनल प्रवेश गरेको जनकपुरले अब उपाधिका निम्ति सुदूरपश्चिम रोयल्सविरुद्ध प्रतिस्पर्धा गर्नेछ । प्रतियोगिताको फाइनल खेल शनिबार हुनेछ ।