काठमाडौं । नेपाल प्रिमियर लिग (एनपीएल)को टोली लुम्बिनी लायन्सका कप्तान रोहितकुमार पौडेलले आफ्नो टोलीको सम्भावना समाप्त भइनसकेको बताएका छन् ।

लुम्बिनीले एनपीएलमा पहिलो जित निकाल्ने क्रममा मंगलबार चितवन राइनोजविरुद्ध ३३ रनको जित निकालेको थियो । यो लुम्बिनीले आफ्नो पाँच खेलमध्ये निकालेको पहिलो जित हो ।

लुम्बिनीको जितमा अलराउन्ड प्रदर्शन गरेका रोहितले ब्याटिङमा ८० रन र बलिङमा चार विकेट लिएका थिए । रोहित प्रतियोगितामा सबैभन्दा धेरै रन बनाउने ब्याटर समेत हुन् । उनले पाँच खेलमा दुई अर्धशतकसहित २६१ रन बनाएका छन् । जितपछि लुम्बिनीका कप्तान रोहितले प्रतियोगितामा अझै खेल बाँकी रहेको हुँदा आफ्नो टिमको सम्भावना कायमै रहेको बताएका हुन् ।

“आजको प्रदर्शन राम्रो थियो । तर, अझै धेरै गर्न बाँकी छ । एनपीएलमा यी सबै कुराहरूमा रमाइरहेको छु । यसअघि टिमले जितेको थिएन । तर, आज टिमले जित्यो । टिमले जितेको खेलमा रन बनाउँदा खुसी लाग्छ,” रोहितले भने, “जित एकदमै महत्त्वपूर्ण थियो । किनकी हालसम्म प्रतियोगिता समाप्त भइसकेको छैन । अबको दुई खेल जित्यो भने अरुको नतिजा हेरेर पनि प्लेअफको सम्भावना बन्न सक्छ ।”

जितसँगै पाँच खेलबाट दुई अंक जोडे पनि लुम्बिनी तालिकाको पुछारमा छ । लुम्बिनीसँगको हारका बाबजुद पाँच खेलबाट ६ अंक जोडेको चितवन तालिकाको तेस्रो स्थानमा छ ।