काठमाडौं । नेपाल प्रिमियर लिग (एनपीएल) मा विराटनगर किंग्सले लगातार दोस्रो हार बेहोरेपछि कप्तान सन्दीप लामिछानेल आफू आफ्नै प्रदर्शनबाट सन्तुष्ट नरहेको बताएका छन् ।

मंगलबार कीर्तिपुरस्थित त्रिवि क्रिकेट मैदानमा भएको पहिलो खेलमा विराटनगर किंग्स सुदूरपश्चिम रोयल्ससँग ९० रनले पराजित भएको थियो । त्यसअघि विराटनगर प्रतियोगिताको उद्घाटन खेलमा जनकपुर बोल्ट्ससँग आठ विकेटले पराजित भएको थियो ।

मंगलबारको खेलपछि कप्तान सन्दीपले आफूले आफ्नै आशाहरूलाई पूरा गर्न नसकेको बताएका हुन् ।

“हामीले मोमेन्टहरूलाई सदुपयोग गर्न सकेनौँ । सुरुआत राम्रो थियो । मेरो ओभरमा विकेट निकाल्नुपर्ने, त्यो हुन सकेन । आउने खेलमा त्यो गल्तीहरूलाई सुधारेर राम्रो प्रदर्शन गर्ने छौँ । मेरो पनि आफ्नै आशाहरू छन् । त्यसलाई पूरा गर्न सकिरहेको छैन,” खेलपछि सन्दीपले भने ।

उनले जितको श्रेय सुदूरपश्चिमलाई दिँदै टिममा लगातारको हारले खुसीको माहोल नबनेको बताए ।

“दबाबभन्दा पनि टिममा मोमेन्टम छैन । श्रेय दीपेन्द्रलाई जान्छ । जसरी उनले आफ्नो टिमलाई अघि बढाए । हारले पक्कै पनि टिममा खुसीको माहोल छैन । तर, पक्कै पनि त्यो आउने नै छ,” उनले थपे, “१० खेलमा लगातार विकेट लिँदा तपाईले कसरी यति विकेट लिनुभयो भन्ने सोध्दैनन् । विकेट निकाल्नु मेरो काम हो । तर, ननिस्किएको खण्डमा कसरी रन रोक्न सकिन्छ पक्कै पनि त्यसमा काम गर्छु ।”

प्रतियोगितामा लगातार दुई हार बेहोरेको विराटनगर तालिकाको पाँचौँ स्थानमा छ । पहिलो खेलमा जित निकालेको सुदूरपश्चिम भने दुई अंकसहित तालिको तेस्रो स्थानमा छ ।