काठमाडौं । नेपाल प्रिमियर लिग (एनपीएल)मा सोमबार दुई खेल भए । लिगको उद्घाटन भएको दिनमा एउटामात्र खेल भएको थियो । अहिलेसम्म पाँच टिमले प्रतिस्पर्धा गरिसके । पाँचमध्ये चार टिम पहिलो खेलमा ब्याटिङमा संघर्षरत देखिए । तर, जनकपुरको ब्याटिङ प्रदर्शन अब्बल र बलियो देखिएको छ । 

शनिबार भएको उद्घाटन खेलमा जनकपुरले सन्दीप लामिछानेको कप्तानीमा रहेको विराटनगर किंग्सविरुद्ध आठ विकेटको सहज जित निकाल्दै विजयी सुरुआत गरेको थियो । त्यसको ४८ घण्टापछि पुनः मैदान उत्रिएको जनकपुरले सोमबार पनि सोही लयलाई कायम राख्यो । सोमबार कीर्तिपुरमा भएको दोस्रो खेलमा जनकपुरले कर्णाली याक्सविरुद्ध आठ विकेटकै जित निकाल्यो ।

 अरू टिम संघर्षरत रहँदा जनकपुरको प्रदर्शन बलियो देखिएपछि सोमबारको खेलपछि जनकपुरका प्रशिक्षक पुबुदु दासानायकेलाई पत्रकारबाट प्रश्न आयो– तपाईंको टिमले कसरी यो लय बनाइरहेको छ ? 

जवाफ दिन दासानायकेले समय लगाएनन् । भनिहाले, “हाम्रो टिम शालीन छ । टिमलाई कुन बेला के गर्नुपर्छ भन्ने राम्रोसँग थाहा छ ।”

उद्घाटन खेलमा विराटनगरविरुद्ध जनकपुरका दुवै ओपनर ‘फ्लप’ रहे । पहिलो खेलमा जनकपुरका ‘मार्की’ आसिफ शेख शून्यमा आउट भए । कप्तान अनिल साहले पनि टिमको खातामा पाँच रनको मात्रै योगदान गरे । तर, सोमबारको खेलमा यो ओपनर जोडी सहज जितको सारथी बन्यो ।

उनीहरूले १४२ रनको लक्ष्य पछ्याउने क्रममा ९.४ ओभरमा ८४ रनको आक्रामक साझेदारी गर्दै टोलीलाई सहज जितउन्मुख गराएका थिए । अझ यसमा निर्णायक बने, कप्तान अनिल । 

खेलको ‘प्लेयर अफ द म्याच’ चुनिएका अनिलले करिब १५० को स्ट्राइक रेटमा ब्याटिङ गर्दै ४२ बलमा ६ चौका र तीन छक्कासहित अविजित ६२ रन बनाए । योसँगै अनिल प्रतियोगितामा अर्धशतक बनाउने तेस्रो ब्याटर बने । उनीअघि जनकपुरकै लहिरू मिलान्थाले र विराटनगरका मार्टिन गप्टिलले अर्धशतक बनाएका थिए ।

सोमबारसम्म प्रतियोगिताको ब्याटिङमा जनकपुरकै हालीमुहाली छ । पहिलो खेलमै लहिरू मिलान्थाले र हर्ष थाकेरले ११६ रनको अविजित शतकीय साझेदारी गरेका थिए । जुन अहिलेसम्म एनपीएलको सबैभन्दा ठूलो साझेदारी हो ।

यसैमा सोमबार अनिल र आसिफको जोडीले अर्को कीर्तिमान थपे । यी दुईले बनाएको ८४ रन लिगमा अहिलेसम्मकै ओपनिङ जोडीले बनाएको ठूलो साझेदारी हो । यसमा आसिफले २९ बलमा दुई चौका र दुई छक्कासहित ३६ रन थपे । यसअघि पहिलो विकेटका निम्ति चितवन राइनोजका ओपनरद्वय दीपक बोहरा र हसन आइसाखिलले बनाएको १८ रनको साझेदारी नै अहिलेसम्मको ठूलो थियो ।

टिमले ब्याटिङमा देखाएको प्रदर्शनबाट मख्ख जनकपुरका प्रशिक्षक दासानायके अनिल र आसिफ एउटै टिममा हुनुले यो नतिजामा महत्त्वपूर्ण भूमिका खेलिरहेको बताउँछन् । उनले अनिलको कप्तानीले आफूलाई अच्चमित बनाएको प्रतिक्रियासमेत दिए ।

“अनिल र आसिफसँगै हुनुमा हामी भाग्यमानी बन्यौँ । उनीहरूलाई यहाँका सबै बलरहरूबारे थाहा छ । अनिलले कप्तानको रूपमा पछिल्लो दुई खेलमा निकै राम्रो गरेका छन् । उनको कप्तानीले मलाई अच्चमित बनाएको छ,” प्रशिक्षक दासानायकेले थपे ।

ब्याटिङमा अरू टिमको संघर्ष

प्रतियोगिताको उद्घाटन खेलमा जनकपुरविरुद्ध टस हारेर ब्याटिङमा आएको विराटनगर १९ ओभरमा १२७ रनमै समेटिएको थियो । जसलाई जनकपुरले १५.३ ओभरमा दुई विकेट गुमाएर सहजै पूरा गर्‍यो । 

त्यसपछि सोमबार भएको पहिलो खेल पनि चितवन राइनोज र काठमाडौं गुर्खाजले मध्यम योगफलमा लडाइँ गरे । टस हारेर ब्याटिङमा आएको काठमाडौंले निर्धारित २० ओभरै ब्याटिङ गरे पनि खातामा १११ रनभन्दा धेरै जोड्न सकेन । जसलाई भेटाउन चितवनले पनि १८औँ ओभरसम्म कुर्नुपर्‍यो । १८औँ ओभरको पहिलो बलमा लक्ष्य पूरा गर्दा चितवनले पाँच विकेट गुमाएको थियो ।

सोमबारको दोस्रो खेलमा टस जितेर ब्याटिङमा आएको कर्णालीले निर्धारित २० ओभरमा १४१ रन बनायो । यो प्रतियोगिता हालसम्म बनेको सबैभन्दा ठूलो योगफलसमेत हो । कीर्तिपुरको पिचले ब्याटरमा उत्पन्न गराएको समस्याका कारण जनकपुरलाई यो लक्ष्य सहज नरहने अनुमान थियो । तर, पुनः पहिलो खेलको लयलाई कायम राख्दै जनकपुरले १४२ रनको लक्ष्य १५.१ ओभरमा दुई विकेट गुमाएर पूरा गर्‍यो ।

सोमबार जनकपुरबाट ब्याटिङमा उत्रिएका कुनै पनि ब्याटर एक अंकको स्कोरमा आउट भएनन् । अनिल र आसिफको ओपनर जोडीबाहेक तेस्रो नम्बरमा ब्याटिङका निम्ति मैदान उत्रिएका लहिरू मिलान्था अझै आक्रामक देखिए । उनले ३१ बलमा दुई चौका र दुई छक्कासहित २४ रन थपे । अविजित रहेका जिम्मी निसमले पनि २०० स्ट्राइक रेटमा ब्याटिङ गर्दै आठ बलमै १६ रन बनाए ।

लगातार दुई सहज जितपछि प्रशिक्षक दासानायकेले भने,  "हामीले दुई खेलमा गर्न आवश्यक रहेका कुराहरू देखाइसक्यौँ । अब आगामी खेलमा पनि यस्तै लय राख्ने लक्ष्यमा छौँ ।”

जनकपुरले अब मंसिर २० गतेको दोस्रो खेलमा पोखरा एभेन्जर्सविरुद्ध खेल्नेछ ।

तस्बिरहरू : हरिशजंग क्षेत्री/बाह्रखरी