काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेको काठमाडौंमा बयान सकिएको छ । जिल्ला सरकारी वकिल कार्यालय काठमाडौंमा तीन दिनसम्म चलेको बयानमा लामिछानेले ७४ प्रश्नको जवाफ दिएको कार्यालयका प्रमुख सन्देश श्रेष्ठले जानकारी दिए ।

उनका अनुसार, शुक्रबार सुरु भएको बयान आज सकिएको हो । बयानमा रविले निरन्तरूपमा सहकारीमा आफ्नो संलग्नता नरहेको दाबी गर्दै आएका छन् ।

पोखराको सूर्यदर्शन सहकारी ठगी प्रकरणमा पक्राउ परेका लामिछानेलाई स्वर्णलक्ष्मीको रकम अपचलनबारे बयान लिन गएको बिहीबार काठमाडौं ल्याइएको थियो । शुक्रबारदेखि उनको बयान लिन थालिएको थियो ।

लामिछानेलाई यसअघि बुटवलको सुप्रिम सहकारीको रकम अपचलनका विषयमा बयान लिन पोखराबाट त्यहाँ समेत लगिएको थियो । गएको कात्तिक २ गते उनलाई रास्वपाको केन्द्रीय कार्यालय काठमाडौंबाट प्रहरीले पक्राउ गरेको हो ।

सूर्यदर्शन सहकारीको रकम अपचलन प्रकरणमा असोज ६ गते पक्राउ परेका नेपाल प्रहरीका पूर्वडीआईजी छविलाल जोशी पनि हालसम्म थुनामा छन् । उनलाई समेत बुटवल र काठमाडौं ल्याएर बयान लिइएको थियो ।

ओखलढुंगाका गितेन्द्रबाबु (जीबी) राईद्वारा सञ्चालित गोर्खा मिडियाअन्तर्गतको ग्यालेक्सी टेलिभिजनमार्फत उनै सञ्चालक रहेका विभिन्न पाँच सहकारीको रकम अपचलन भएको खुलेपछि लामिछानेसहित छवि पक्राउ परेका हुन् । लामिछाने ग्यालेक्सी टेलिभिजनका पूर्वप्रबन्ध निर्देशक र छवि सञ्चालक हुन् ।

उनीहरूविरुद्ध पर्साको वीरगन्जस्थित सानोपाइला सहकारीको रकम अपचलनका विषयमा समेत प्रहरीले पक्राउ पुर्जी लिने तयारी गरेको छ । पर्सा प्रहरी स्रोतका अनुसार, आज वा भोलिमा रवि, छवि र जीबीविरुद्ध पक्राउ पुर्जीका निम्ति अदालतको अनुमति लिने तयारी छ । सहकारी ठगी, संगठित अपराध र सम्पत्ति शुद्धीकरणसम्बन्धी मुद्दामा उनीहरूमाथि अनुसन्धान भइरहेको छ ।

काठमाडौंलगत्तै रवि र छविलाई पर्सा लैजाने प्रहरीको तयारी छ । उनीहरूमाथि चितवनको सहारा सहकारीको रकम अपचलनका विषयमा समेत अनुसन्धान गरिने प्रहरीले जनाएको छ ।