काठमााडौं । राष्ट्रिय स्वतन्त्र पार्टी (रास्वपा)का नेताहरूविरुद्धको अदालतको अवहेलना मुद्दामा सर्वोच्च अदालतले रास्वपा नेताहरूको भाषण ट्रान्सक्राइभसहित प्रमाण पुर्‍याउन निवेदक अधिवक्ता अनुपम भट्टराईका नाममा आदेश जारी गरेको छ ।

न्यायाधीशहरू डा. मनोजकुमार शर्मा र नृपध्वज निरौलाको संयुक्त इजलासले निवेदकलाई पेस गरेको कागजातको पूर्णपाठ तथा भिडियो क्लिप र भिडियोलाई लिपिबद्ध (ट्रान्सक्राइब) गरी बुझाउन भनिएको छ ।

“यसमा निवेदनसाथ पेस गरेको कागजातको पूर्णपाठ तथा भिडियो क्लिप तथा सो भिडियोलाई लिपिबद्ध गरी निवेदकबाट यथाशीघ्र पेस गर्न लगाई नियमअनुसार पेस गर्नु,” गत मंगलबार भएको आदेशमा भनिएको छ ।

सहकारी ठगी प्रकरणमा रवि लामिछाने गत कात्तिक २ गते पक्राउ परेका थिए । उनलाई सोही दिन काठमाडौंबाट पोखरा लगिएको थियो । त्यसपछि पोखरा नै पुगेर रास्वपाका नेताहरूले राजनीतिक प्रतिशोध साँधिएको भन्दै आन्दोलन थालेका थिए । अदालतले थुनामा राखेर अनुसन्धानको अनुमति दिएपछि निरन्तर आन्दोलन गरेको रास्वपाले म्याद थपका दिन आन्दोलन चर्काउँदै आएको थियो ।

आन्दोलनका क्रममा रास्वपाका नेताहरूले रविलाई थुनामा राख्नुको औचित्य नभएको भन्दै न्यायाधीशको म्याद थपको आदेशको औचित्यमा प्रश्न उठाउँदै भाषण गरेका थिए । रास्वपाका कार्यवाहक प्रवक्ता मनिष झाले ‘न्यायाधीशलाई सोध्नुहोला, तपाईं कुन पार्टीको’ भन्दै भाषण गरेपछि त्यसलाई नै आधार बनाएर अधिवक्ता भट्टराईले अदालतको अवहेलनाको निवेदन दायर गराएका थिए ।