जनकपुर । मधेस आन्दोलनका सहिद परिवारका सदस्यले रोजगारीको माग गर्दै मुख्यमन्त्री तथा मन्त्रिपरिषद्को कार्यालयअगाडि प्रदर्शन गरेका छन् । उक्त आन्दोलनमा मधेस प्रदेशबाट ५२ जना सहिद भएका थिए ।

सात वर्षआगाडि मधेस प्रदेश सरकारको पहिलो मन्त्रिपरिषद्को बैठकबाट सहिद परिवारका एक/एकजनालाई रोजगारी दिने निर्णय गरिएको थियो । हालसम्म निर्णय कार्यान्वयन नभएको भन्दै सहिद परिवारका सदस्य आन्दोलनमा उत्रिएका हुन् ।

मुख्यमन्त्रीको कार्यालयअगाडि गरिएको प्रदर्शनमा प्रदेशका आठै जिल्लाका सहिद परिवारका सदस्य सहभागी भएका छन् । उनीहरूले प्रदेश सरकारले आफूहरूको माग पूरा नगरेसम्म घर नफर्कने चेतावनी दिएका छन् ।

सहिद परिवारका सदस्य रामनरेश राय यादवले मुख्यमन्त्री सतिशकुमार सिंहलाई पहिलो मन्त्रिपरिषद्को निर्णय कार्यान्वयन गर्न पटकपटक भेटेर आग्रह गर्दा पनि बेवास्ता गरेपछि आन्दोलन गर्नुपरेको गुनासो गरे ।

उनका अनुसार, ५२ सहिद परिवारका एक/एक सदस्यलाई रोजगारी दिने सरकारले निर्णय गरेको थियो । सात वर्षसम्म त्यो निर्णय कार्यान्वयन भएको छैन । केही सहिद परिवारलाई मात्र करारको जागिर दिइएको छ । उनीहरूलाई पनि हटाउन खोजिएको उनले बताए ।

यादवले भने, “सरकारले गरेको निर्णयानुसार सबै सहिद परिवारका एक/एक सदस्यलाई स्थायी जागिरको व्यवस्थापन गर्नुपर्ने आफूहरूको माग रहेको छ ।” रासस