काठमाडौं । आज एकै दिन दुई नेपाली चलचित्र रिलिज भएका छन् । चलचित्र ‘तेल भिसा’ र ‘अग्निदहन’ रिलिज भएका हुन् । 

‘तेल भिसा’ पारिवारिक कथावस्तुमा र ‘अग्निदहन’ सामाजिक कथावस्तुमा बनेका चलचित्र हुन् । 

‘तेल भिसा’ले मल्टिप्लेक्समा सन्तोषजनक शो पाएको छ । शुक्रबार रिलिज हुने चलचित्राई देशकै ठूलो मल्टिप्लेक्स क्यूएफएक्स चेनले काठमाडौं उपत्यकामा २७ शो दिएको छ । 

‘अग्निदहन’ले भने काठमाडौं उपत्यकामा क्यूएफएक्सका आउटलेटमा जम्मा तीन शो पाएको छ । 

‘तेल भिसा’मा विपीन कार्की मुख्य भूमिकामा छन् । ‘तेल भिसा’मा वर्षा राउत, पूजा चन्द, ऋचा घिमिरे, बुद्धि तामाङ, सुचित्रा उप्रेती र विदेशी कलाकारहरुको यो चलचित्रमा अभिनय रहेको छ । 

अनिल पाण्डे र शिवराज कार्कीको लगानी रहेको चलचित्रका कार्यकारी निर्माता प्रिन्स युवराज कार्की र श्रुती दाहाल हुन् ।

‘तेल भिसा’ शंकर घिमिरेले निर्देशन गरेको चलचित्र हो । यो चलचित्र अमेरिका र नेपालमा छायांकन गरिएको छ । 

अमेरिकामा रहेका नेपालीले पाउने दुःख यो चलचित्रको मुख्य कथा हो ।

घनश्याम लामिछानेले निर्देशन गरेको चलचित्र ‘अग्निदहन’मा प्रकाश घिमिरे, प्रमिला तुलाचन, माओत्से गुरुङ, अनुपमा भण्डारी, तुलसी क्षेत्री, विष्णु बास्तोला, तारा बहादुर गुरुङको अभिनय छ ।

चलचित्रमा लोकमणि पौडेलको कथा, पटकथा तथा संवाद छ । कोविदशरण उपाध्यायको परिकल्पना, परिच्छेद सेनको सहायक निर्देशन, दीर्घ गुरुङको छायांकन, दीर्घ खड्काको सम्पादन, शंकर पाण्डेको प्रोडक्सन डिजाइन छ ।