काठमाडौं । युक्रेनको राजधानी किभस्थित अमेरिकी दूतावास बन्द गरिएको छ । अमेरिकाको कन्सुलर मामिला विभागले सामाजिक सञ्जाल एक्समा सम्भावित हवाई आक्रमणको जानकारी पाएको उल्लेख गरेको छ ।

“किभस्थित अमेरिकी दूतावासले बुधबार (नोभेम्बर २०)मा सम्भावित महत्त्वपूर्ण हवाई आक्रमणको विशेष सूचना प्राप्त गरेको छ,” विभागले एक्समा लेखेको छ ।

किभस्थित अमेरिकी दूतावासले आफ्ना नागरिकलाई दूतावास बन्द हुने र कुनै पनि हवाई अर्लट बज्ने बित्तिकै आश्रय (सेल्टर) लिन आग्रह गरेको छ ।

अमेरिकी राष्ट्रपति जो बाइडेनले युक्रेनलाई रुसी भूमिमा लामोदुरीका मिसाइल हान्न अनुमति दिएसँगै रुससँगको युद्ध चर्किने सम्भावना बढेको छ ।

युक्रेनीले रुसी भूमिमा टाढासम्म आक्रमण गर्न थालेसँगै रुसले आफ्नो आणविक हतियार प्रयोग गर्ने नीति समेत परिमार्जन गरेको छ । यसबीच किभस्थित अमेरिकी दूतावासले ठूलो हवाई आक्रमण हुनसक्ने जानकारी पाएको जनाएको हो ।