काठमाडौं । आन्द्रिएन राबिओटको दुई गोलप्रेरित फ्रान्सले इटालीविरुद्ध ३–१ को जित निकाल्दै यूईएफए नेसन्स लिग समूह ए२ को शीर्ष स्थान हासिल गरेको छ ।

प्रतियोगितामा यी दुई टिमले क्वार्टरफाइनल यात्रा तय गरिसकेका छन् । सोमबार घरेलु मैदानमै पराजित भएपछि इटालीलाई उछिन्दै फ्रान्सले शीर्ष स्थान हासिल गरेको हो ।

सान सिरोमा फ्रान्सलाई जित दिलाउन राबिओटले दुई गोल गरे । फ्रान्सले अर्को एक गोल भने आत्मघाती उपहार पाएको थियो । इटालीका आन्द्रिया काम्बियासोले एक गोल फर्काएका थिए ।

खेलको दोस्रो मिनेटमै राबिओटले फ्रान्सलाई अग्रतामा राखेका थिए । ३३औँ मिनेटमा इटालीका गोलकिपर गुलियामो भिकारियोबाट आत्मघाती गोल उपहार पाएपछि फ्रान्सले अग्रता दोब्बर बनायो । ३५औँ मिनेटमा इटालीका काम्बियासोले गोल फर्काएपछि पहिलो हाफमा फ्रान्सले २–१ को अग्रता बनाएको थियो । ६५औँ मिनेटमा राबिओटले दोस्रो गोल गरेपछि फ्रान्सले अग्रतालाई ३–१ मा पुर्‍याएको थियो ।

जितसँगै ६ खेलबाट १३ अंक जोडेको फ्रान्सले शीर्ष स्थान हासिल गरेको हो । फ्रान्सले इटालीलाई गोलआधारमा पछि पारेको हो । समान खेल खेलेको इटालीको पनि १३ अंक नै छ ।

इजरायल १–० बेल्जियम
यही समूहको अर्को खेलमा इजरायलसँग बेल्जियम १–० ले स्तब्ध बनेको छ । खेलको निर्धारित समय सकिन ६ मिनेट बाँकी रहँदा यार्डेन सुआले निर्णायक गोल गरेपछि इजरायलले अप्रत्याशित नतिजा निकालेको हो ।

जितका बाबजुद ६ खेलबाट चार अंक जोडेको इजरायल तालिकाको पुछारमा छ । समान खेलबाट चार अंककै बेल्जियम तेस्रो स्थानमा छ ।