काठमाडौं । कथाकार जीवराज भट्टराईको कथासंग्रह ‘अभिशप्त कुइनेटाहरू’ सार्वजनिक गरिएको छ । शनिबार काठमाडौंमा नेपाल स्रष्टा समाजद्वारा आयोजित कार्यक्रममा अग्रज साहित्यिक पत्रकारहरू नगेन्द्रराज शर्मा र रोचक घिमिरेलगायत व्यक्तिले उक्त कृति सार्वजनिक गरेका हुन् ।

समालोचकद्वय डा. शान्तिमाया गिरी र डा. दीनबन्धु शर्माले कृतिभित्र समाजलाई सूक्ष्म तवरबाट निरीक्षण गरेर लेखिएका कथाहरू संगृहीत रहेको बताए । कथाभित्र पनि अनेक कथाहरू भेटिने उनीहरूले उल्लेख गरे ।

समाजका अध्यक्ष श्रीओम श्रेष्ठ ‘रोदन’ले वर्षमा दुई हजारभन्दा बढी पुस्तक प्रकाशन हुने गरेको बताए । सरकारले स्रष्टाको सम्मान गर्न नसकेको उनको भनाइ थियो ।

कार्यक्रममा प्रा. डा. गोपिन्द्रप्रसाद पौडेल, प्रा. डा. महेशकुमार आचार्य, प्रकाश घायल र डा. सदानन्द कडेलले आफ्नो धारणा राखेका थिए ।