काठमाडौं । अमेरिकी राष्ट्रपति चुनावमा डोनाल्ड ट्रम्पको जित औपचारिक रूपमा घोषणा भइसकेको छैन । तर, विश्वभरका नेताहरूले ट्रम्पलाई बधाई दिन थालेका छन् । 

यो सूचीमा युक्रेनी राष्ट्रपति भोलोडिमिर जेलेन्स्की पनि छन् । जेलेन्स्कीले भनेका छन्, “चुनावमा ठूलो जित हासिल गरेकोमा डोनाल्ड ट्रम्पलाई बधाई छ ।” 

जेलेन्स्कीले सामाजिक सञ्जाल एम्समा लेखेका छन्, “मलाई सेप्टेम्बरमा राष्ट्रपति ट्रम्पसँग भएको भेटवार्ताको सम्झना छ । उक्त भेटमा हामीले युक्रेन–अमेरिकाको रणनीतिक साझेदारी, विजयको योजना र युक्रेनमाथि भइरहेको रुसी आक्रमण समाप्त गर्ने बारेमा छलफल गरेका थियौँ ।” 

विश्व मामिलामा ट्रम्पको ‘शक्तिमार्फत शान्ति’को प्रतिबद्धताको प्रशंसा गर्ने उनले बताएका छन् । यही सिद्धान्तले युक्रेनलाई शान्तिको नजिक ल्याउन सक्ने पनि उनले जनाएका छन् । “मलाई आशा छ कि हामी यो मिलेर पूरा गर्नेछौँ,” युक्रेनी राष्ट्रपतिले भनेका छन् ।

हालै जेलेन्स्कीले रुस–युक्रेन द्वन्द्व अन्त्य गर्न ‘विजय योजना’ प्रस्तुत गरेका थिए । यसमा नेटोमा सामेल हुन औपचारिक निमन्त्रणा, रुसको भित्री भागसम्म आक्रमण गर्ने अनुमति दिने र रूसको कुर्स्क क्षेत्रमा निरन्तर आक्रमण गर्ने जस्ता विषय थिए । 

सेप्टेम्बरमा जेलेन्स्कीलाई भेटेपछि डोनाल्ड ट्रम्पले भनेका थिए, “यो युद्ध छिट्टै अन्त्य हुनुपर्छ किनभने युक्रेन र यसका राष्ट्रपतिले ठूलो कठिनाइको सामना गरिरहेका छन् ।”