काठमाडौं । सुदूरपश्चिम विश्वविद्यालय र दक्षिण कोरियाको जोनबुक नेशनल युनिभर्सिटीबीच शैक्षिक कार्यक्रममा सहकार्य गर्ने समझदारीमा हस्ताक्षर गरी आदानप्रदान भएको छ । 

गएको शुक्रबारदेखि ललितपुरमा भएको अन्तर्राष्ट्रिय वैज्ञानिक सम्मेलनका क्रममा आइतबार समझदारी पत्रमा हस्ताक्षर भएको हो । सुदूरपश्चिम विश्वविद्यालयमा उपकुलपति प्रा. डा. हेमराज पन्त र दक्षिण कोरियाको जोनबुक नेशनल युनिभर्सिटीका अध्यक्ष डा. ओ बोङ याङले हस्ताक्षर भएको पाँचबुँदे समझदारीपत्र आदानप्रदान गरेका छन् । 

समझदारीमा विश्वविद्यालयका फ्याकल्टिज, प्राध्यापक तथा अनुसन्धानकर्ता आदानप्रदान गर्ने, सुदूरपश्चिमका विद्यार्थीहरू आदानप्रदान गर्ने, शैक्षिक सामग्री तथा सूचना आदानप्रदान गर्ने, संयुक्त रूपमा अनुसन्धान सञ्चालन गर्ने, प्राज्ञिक बैठक तथा सेमिनारहरू आयोजना गर्ने उल्लेख छ । सुदूरपश्चिम विश्वविद्यालयका उपकुलपति प्रा. डा. पन्तले शैक्षिक तथा प्राज्ञिक उन्नयनका लागि दुई विश्वविद्यालयबीचको समझदारी दुरगामी महत्त्व राख्ने जानकारी दिए । 

सन् १९४७ मा स्थापना भएको जोनबुक विश्वविद्यालयका प्रा. डा. ह्याक योङ किमले सुदूरपश्चिम विश्वविद्यालयका उपकुलपतिसहित २१ जनाको विद्यावारिधिकका लागि सुपरभाइज गरेका छन् । समझदारीपत्र आदानप्रदान गर्दै उनले नेपाली विद्यार्थीहरूको अनुसन्धान कार्यमा सहयोग गर्ने औपचारिक समझदारी भएकोमा खुसी व्यक्त गरेका छन् । 

सन् २०१० मा स्थापना भएको सुदूरपश्चिम विश्वविद्यालयले पछिल्लो समय अनुसन्धान र अन्वेषणमा जोड दिँदै विद्यार्थीहरूलाई अन्तर्राष्ट्रिय प्राज्ञिक पहुँचका लागि काम गर्दै आएको छ । नेपाल मटेरियल साइन्स सोसाइटीले आयोजना गरेको अन्तर्राष्ट्रिय वैज्ञानिक सम्मेलनलाई पनि सुदूरपश्चिम विश्वविद्यालय सहआयोजकको रूपमा रहेको छ ।