काठमाडौं । सिनेमा ‘फेरि रेशम फिलिलि’को अफिसियल घोषणा गरिएको छ । शुक्रबार निर्माणपक्षले सिनेमा निर्माणको अफिसियल घोषणा गरेको हो । 

चलचित्रको लेखन तथा निर्देशन निरोज महर्जनले गर्नेछन् । सिनेमा आर्टसको प्रस्तुति रहने सिनेमा दि मोसन पिक्चर्सको सहकार्यमा बन्नेछ । 

सिनेमामा विनय श्रेष्ठ, कामेश्वर चौरसिया, सुपुष्पा भट्ट, नीर शाह, रवीन्द्र झा, प्रकाश घिमिरे, लक्ष्मी गिरी, महेश त्रिपाठी, एलनराज उप्रेतीलगायत कालाकारको अभिनय रहनेछ । 

रौनक विक्रम कडेल निर्माता रहेको सिनेमामा कार्यकारी निर्माता सुरज बम ठकुरी छन् । सहनिर्माता एनी थापा हुन् । 

सुजन प्रजापतिको छायांकन रहने सिनेमा सम्पादन सुरेन्द्र पौडेलले गर्नेछन् । पटकथा निरोज महर्जन र आकाश बरालको छ । संगीत कालीप्रसाद बास्कोटा, एसीडी योगी, हर्क साउद, कल्याण सिंह, जयन वाइवा, दीपक शर्माको रहनेछ ।