काठमाडौं । नेपाली कांग्रेसका नेताहरू डा. शशांक कोइराला, प्रकाशमान सिंह र विमलेन्द्र निधिबीच भेटवार्ता भयो, यही असोज ७ गते ।

कांग्रेसको महामन्त्री भइसकेका तीन नेताबीच व्यक्तिगत सद्भावका लागि मात्र भेट भएको हो वा राजनीतिक भन्ने विषयमा नेताहरूले औपचारिक धारणा खुलाएका थिएनन् ।

तीन नेताबीचको भेटवार्ताको आयोजक रहेका डा. शशांक कोइरालालाई सोधियो, ‘‘त्यो भेटवार्ता केका लागि हो ?’’

जवाफमा कोइरालाले भेट राजनीति प्रेरित रहेको तर, त्यो व्यक्तिगत सदभावकै कारण सम्भव भएको बताएका छन् । उनका अनुसार, भेटवार्तामा कांग्रेसको आगामी नेतृत्व र कांग्रेस राम्रो बनाउने विषयमा छलफल भएको छ ।

कांग्रेसका संस्थापक सभापति बीपी कोइराला, संस्थापक नेता गणेशमान सिंह र तत्कालीन महामन्त्री महेन्द्रनारायण निधिका पुत्रहरूबीचको वार्ताको प्रयोजनबारे टिप्पणी भइरहेका छन् ।

तीन नेताबीच आउँदो महाधिवेशनमा ‘समझदारी’ गर्ने योजनानुरुप भेटघाट भएको देखिन्छ । “हामी ‘लार्जेष्ट’ पार्टी छौँ । तर, हाम्रो संगठन शिथिल अवस्थामा छ,” डा. शशांकले भने, “यसरी हुँदैन र यो पार्टी राम्रो बनाउनुपर्छ भन्नेमा हाम्रो समझदारी बनेको छ ।”

सिंह र निधि दुवै कांग्रेस सभापतिमा शेरबहादुर देउवासँग प्रतिस्पर्धा गरिसकेका छन् । दुवै पराजित हुन् । भावी नेतृत्व निम्ति साझा समझदारी, सहकार्य र विश्वाससहित अन्त्यमा सहमति हुनसक्ने कोइरालाले बताए ।

डा. शशांकले भनाइमा, एउटा समझदारी बनाउँदै सहकार्य गर्ने हो । हामी कांग्रेसको राम्रो भविष्यका लागि मिलेर अघि बढौँ भन्ने समझदारी मात्र भएको छ । सम्भव भएसम्म एकसाथ नेता कार्यकर्तासँग भेटघाट गर्छौ, सँगसँगै जान्छौँ । ‘‘भावी सभापतिको उमेदवार चाहिँ को बन्छ र कसरी टुंगो लाग्छ त ?’’ जवाफमा कोइराला भन्छन्, “उमेदवार बन्न त मलाई पनि इच्छा छ, प्रकाशजी, विमलजीलाई पनि छ । तर, त्यो इच्छामा कार्यकर्ताको इच्छा मिलेपछि मात्र निर्णायक हुन्छ ।’’

उनले आफूहरूबीच उच्चस्तरको विश्वासको वातावरण र समझदारी निर्माण गर्ने प्रयत्न भइरहेको बताए ।

तीन नेताबीच यसरी नै १४औँ महाधिवेशनको संघारमा पनि भेटवार्ता भएको थियो । तत्कालीन उपसभापति विमलेन्द्र निधिले आफ्नो वैवाहिक वर्षगाँठमा ‘लञ्च मिटिङ’ राखेर सुरु भएको भेटवार्ताको श्रृंखला नै चलेको थियो ।

तर, सहमति नहुँदा निधि र सिंह दुवै सभापतिको उमेदवार बने । उता डा. शशांक महामन्त्रीबाट केन्द्रीय सदस्यमा चुनाव लडेर दोस्रो सर्वाधिक मत ल्याएका थिए । सिंह र निधि दुवैले दोस्रो चरणमा देउवालाई सहयोग गरेका थिए । तर, आउँदो महाधिवेशनमा तीनमध्ये एक मात्र उमेदवार हुने उनको भनाइ छ । “हिजोको अनुभवले पनि हामीलाई परिपक्व निर्णय गर्न सघाउने छ,” डा. शशांकले भने ।

उनी चुस्त र सशक्त संगठन र नागरिकसँग जोडिने कार्यक्रम अनिवर्य सर्त भएको बताउँछन् । कांग्रेस ‘मास वेस’ पार्टी भएकाले देशकोे ‘मुड’ बुझ्नु र नागरिककको ‘पल्स’ छाम्नु दुई अनिवार्य सर्त भएको उनको बुझाइ छ ।

“सर्वप्रथम त देशको ‘मुड’ के हो त्यो बुझ्नु पर्‍यो । मास बेस पार्टीले जनताको ‘पल्स’ छाम्न सक्नुपर्यो,” डा. शशांकले भने, “त्यसका लागि हाम्रो संगठनको स्वरुप त्यस ढंगले निर्माण गर्नुपर्‍यो । संगठन सशक्त पनि हुनुपर्‍यो ।”

उनले जनतासँग जोडिने संगठन नहुँदासम्म जनताको ‘पल्स’ छाम्न नसकिने बताए । कांग्रेसको संगठन लथालिंग भएको र मास बेस पार्टीका लागि नसुहाउँदो रहेको उनको बुझाइ छ । “हाम्रो पार्टी त मासबेस पार्टी हो । मास बेस पार्टीमा कार्यकर्ताभन्दा धेरै महत्त्व विचार र कार्यक्रमको हुन्छ,” डा. शशांकले भने ।

कांग्रेसमा ९ लाख क्रियाशील सदस्य छन् । उनी भन्छन्, “ती सदस्य त कांग्रेसको नेतृत्व निर्माणमा निर्णायक हुन् सिंगो कांग्रेस निर्माणका निर्णायक जनता हुन्,” डा. शशांकले भने ।