काठमाडौं । चलचित्र ‘बेहुली फ्रम मेघौली’ले नेपालमा अहिलेसम्मकै बढी शो पाएको छ । वितरक अशोक शर्माका अनुसार देशभरका हलमा ‘बेहुली फ्रम मेघौली’ले ३३५ शो पाएको जानकारी दिए । 

“नेपाली चलचित्र रिलिजको इतिहासमै यो चलचित्रले सबैभन्दा धेरै शो पाएको छ,” शर्माले बाह्रखरीसँग भने, “काठमाडौंभित्र र बाहिरका मल्टिप्लेक्स र सिंगल थिएटर गरी ३३५ शो पाएको छ ।” अहिलेसम्म ठूला ब्यानर ब्रान्डका सिनेमा रिलिज हुँदा पनि यति शो कुनै चलचित्रले नपाएको उनले बताए । 

‘बेहुली फ्रम मेघौली’का कलाकार तथा निर्माता निश्चल बस्नेतले फेस्टिभल मुड, पब्लिसिटी म्याटरको प्रभाव, सिनेमाका कन्टेनलगायतका कारण धेरै शो पाएको हुनसक्ने बताए । “प्रदर्शकले पनि दर्शकको इन्क्वारी, रिलिजअगाडिका कन्टेनलगायत केही न केही हेरेर शो दिने होला,” निश्चलले बाह्रखरीसँग भने, “मेकर र कलाकारका हिसावले सबैभन्दा धेरै शो पाएको सुन्दा खुसी लागेको छ ।

स्वस्तिमा खड्का र निश्चल बस्नेतको मुख्य भूमिका रहेको चलचित्र सजन काफ्ले र आकाश बरालले निर्देशन गरेका छन् । 

चलचित्रमा बसुन्धरा भुसाल, विजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, टीका पहारीलगायतको पनि अभिनय रहेको छ । सिनेमाले उमेर पुगेकी युवतीमाथि समाज र परिवारले विवाहका लागि दिने दबाब र त्यसपछिकाे उत्पन्न परिस्थितिको कथा पेस गर्नेछ ।

ब्ल्याक हर्स पिक्चर्स र मेघौली फिल्मस्को ब्यानरमा निर्माण भएको सिनेमामा अभिनेत्री स्वस्तिमा खड्का र निश्चल बस्नेतको लगानी छ । 

अभिनेता विजय बराल कास्टिङ डिरेक्टर रहेको सिनेमामा नरेन्द्र मैनालीको छायांकन, प्रदीप लामा र केवीका खत्रीको कोरियोग्राफी छ । 

जयन जे वाइवा र कुशल पोखरेलको संगीत, निमेष श्रेष्ठको सम्पादन, घनश्याम श्रेष्ठको प्रोडक्सन डिजाइन छ । सिनेमालाई एप्पल इन्टरटेनमेन्ट र डीसीएनले वितरण गर्दैछन् । चलचित्र भाेलिबाट रिलिज हुँदै छ ।