काठमाडौं । नायक तथा निर्देशक बिराज भट्टले नेपाली कमेडी वा लभस्टोरी चलचित्र कुनै पनि देशका सिनेमासँग तुलना नहुने बताएका छन् । एक्सन सिनेमा भने बलिउड र हलिउडसँग तुलना हुने उनको भनाइ छ ।

एक्सन जनराका सिनेमालाई कुनै पनि भाषा र भूगोलले नछेक्ने उनी बताउँछन् । अन्य जानराका चलचित्रका तुलनामा एक्सन सिनेमालाई बढी चुनौती रहेको उनको जिकिर छ ।

भोजपुरी सिनेमाबाट आफूले सिकेको एक्सनलाई नेपालीमा प्रयोग गर्ने उनी बताउँछन् । साउथका चलचित्र हेरेर एक्सन सिनेमा हेर्न बानी परेका नेपाली दशर्कलाई उच्च गुणस्तरको फिल्म दिने उनी सुनाउँछन् ।

‘१२ गाउँ’ विदेशी एक्सन सिनेमासँग प्रतिस्पर्धा गर्ने स्तरको चलचित्र बनेको उनको भनाइ छ । “दसैँमा आउने अरू दुईवटा चलचित्रभन्दा कसरी सुपरहिट बनाउने भन्ने मेरो उद्देश्य होइन । मेरो उद्देश्य नेपाली चलचित्रलाई कसरी माथि उकास्ने भन्ने हो,” बिराजले बिहीबार काठमाडौंमा आयोजित एक कार्यक्रममा भने, “अन्य जानराका चलचित्र अर्ग्यानिक मौलिक भन्ने हुन्छ, कुनै विदेशी सिनेमासँग तुलना हुँदैन । तर, जब हामी एक्सन फिल्म बनाउँछौँ – पठान, सलारजस्तो छ भन्ने कुरा आउँछ । त्यस्तो सिनेमा हामी बनाउन सक्छौँ ? हाम्रो बजेट सानो छ, यथार्थ यही हो ।” 

समीर भट्टको बडी ‘सलार’को हिरोको भन्दा राम्रो लागेको हुन सक्ने भन्दै व्यक्तिगत मिहिनेत र तयारीले नेपाली चलचित्र उद्योगलाई विदेशमा चिनाउनुपर्नेमा बिराज जोड दिन्छन् । एक्सन सिनेमा बनाउन ‘१२ गाउँ’बाट सुरुआत भएको भन्दै उनले आफू एकदुई चलचित्र बनाएर नहराउने प्रतिबद्धता जनाए ।

“मैले पैसा बढी भएर साउथको टेक्निसिएन राखेको होइन, कसरी नेपाली एक्सन सिनेमालाई राम्रो बनाउन सकिन्छ भनेर हो । कसरी नेपाली एक्सन सिनेमालाई विदेशमा लैजाने भनेर हो,” बिराजले भने ।

समीर भट्टले आफूले सक्दो राम्रो काम गर्ने प्रयास गरेको बताए । बुवा (बिराज भट्ट)लाई आदर्श मानेर उनकै योजनामा अगाडि बढिरहेको समीरले सुनाए ।

“मैले अहिले १२ गाउँमा जे गरेको छु र जति मिहिनेत गरिरहेको छु, यसको सबै देन मेरो बुवा नै हो । मैले जे गरिरहेको छु, यसमा २० प्रतिशत मात्रै मेरो देन हो, बाँकी ८० प्रतिशत बुवाकै देन हो,” उनले भने, “बुवा वास्तवमा रमाइलो मान्छे हो । ममी र मलाई हँसाइरहनुहुन्छ । तर, काममा भने उहाँ कहिल्यै रमाइलो गर्नु हुन्न । काममा सधैँ गम्भीर मान्छे हो उहाँ ।”

हरेक मान्छेको जीवनमा राम्रो गुरुको खाँचो हुने र त्यो आफ्ना लागि बुवा भएको उनले बताए । यसअर्थ आफू भाग्यमानी रहेको उनी बताउँछन् ।

बिराजजति एक्टिभ आफू हुन नसक्ने भन्दै समीरले बुवाको तारिफ गरे । आफूलाई बिराजको छोरा हुनुमा सधैँ गम्भीर गर्व रहेको र अब पनि सधैँ उनकै छोरा भनेर चिनिन पाउँदा खुसी लाग्ने उनको भनाइ छ ।

“अहिले मलाई सबैले बिराज भट्टको छोरा भनेर चिन्नुहुन्छ । अबको २० र ३० वर्षपछि पनि उहाँकै छोरा भएर चिनिन पाउँदा मलाई अझै खुसी लाग्नेछ,” उनले भने ।

सिनेमाका निम्ति भनेर आफूले मुम्बईमा बसेर १० वर्षदेखि तयारी गरेको उनले सुनाए । तर, आफू जुन चलचित्रमा काम गरिरहेको हो त्यसभन्दा पर गएर पछिका बारेमा धेरै नसोच्ने गरेको उनको भनाइ छ ।

“धेरै प्लानिङ गरेर काम गर्दा पनि सधैँ त्यसअनुरूप हुन्छ भन्ने हुँदैन होला । सोचेजस्तो भएन भने पीडा हुन्छ,” समीर भन्छन्, “त्यसैले वर्तमानमा म १२ गाउँको काममा छु । त्यसपछि बलिदानमा छु । यसमै म मिहिनेत गरिरहेको छु ।” 

बिराज भट्टको लेखन तथा निर्देशन रहेको चलचित्र यही असोज २४ गते फूलपातीका दिन रिलिज हुँदै छ । यो चलचित्रमार्फत समीर भट्टले नेपाली रजतपटमा डेब्यु गर्दै छन् ।

समीरसँगै दुई अभिनेत्री पूर्वमिस नेपाल इन्टरनेसनल न्यान्सी खड्का र मोडल सनिशा भट्टराईले पनि डेब्यु गर्दै छन् । चलचित्रमा विराज, समीर, न्यान्सी र सनिशासँगै मुरलीधर, कनिज कोइराला, नरेन खड्का, दीया मास्के, कृष्ण भट्ट, सोनु चन्द्रपाल, कालु राना, अर्जुनजंग शाही, भीष्म जोशी, सुलेमान शंकर, तारा शर्मा, किशोर भट्ट, सन्तोष सरकार र स्टन्ट शिल्भाको अभिनय रहनेछ ।

बिराज भट्ट फिल्म प्रोडक्सन प्रस्तुतिमा निर्मित सिनेमामा अर्जुन पोखरेल र निरजको संगीत, रामजी लामिछाने, सुनील क्षेत्री र कविराज गहतराजको कोरियोग्राफी तथा प्रवीन केएल र भूपेन्द्र अधिकारीको सम्पादन रहनेछ । सिनेमामा विराज स्वयंको कथा र सन्तोष सरकारको पटकथा तथा संवाद लेखन छ ।

एक्सन–थ्रिलर ड्रामा ‘१२ गाउँ’का निम्ति बिराजले भारतबाट द्वन्द्व निर्देशक ल्याएका छन् । तमिल तथा कन्नड सिनेमाका द्वन्द्व निर्देशक स्टन्ट सिल्भालाई नेपाली चलचित्रका सफल द्वन्द्व निर्देशक शंकर महर्जनले सघाएका छन् ।

महेश पौडेलको छायांकन रहेको चलचित्र काठमाडौं, ललितपुर, वीरगन्ज र हेटौँडामा छायांकन गरिएको छ ।