काठमाडौं । प्रधानमन्त्री केपी शर्मा ओलीले नेपाल धितोपत्र बोर्डको अध्यक्षको नियुक्तिको विषयमा पाँच अर्ब डिलको विषयले समस्या ल्याएको बताएका छन् ।

मंगलबार आयोजित पत्रकार सम्मेलनमा प्रधानमन्त्री ओलीले आफ्नो पार्टी सरकारमा भएको तर निर्णय प्रक्रियामा नभएको समयमा आफूलाई तत्कालीन प्रधानमन्त्री र अर्थमन्त्रीले बोर्ड अध्यक्ष हुनेबाट पाँच अर्ब लिन लागेको विषय पत्रिकामा लेखाएको बताए । यही विषयमा आफूले चासो देखाएपछि प्रधानमन्त्री र अर्थमन्त्रीलाई छटपटी चलेको उनको भनाइ छ ।

त्यसबेला प्रधानमन्त्री पुष्पकमल दाहाल ‘प्रचण्ड’ थिए भने अर्थमन्त्री वर्षमान पुन थिए । “हाम्रो पार्टी सरकारमा भए पनि हामी न निर्णय गर्ने ठाउँमा थियौँ । त्यति चाहिँ भनेको हो– तपाईंहरूले हरेक परिस्थितिलाई लाभ लिने अवसरका रूपमा प्रयोग नगर्नू । देशको अवस्था नाजुक छ, यसमा कमिसनखोरी गर्ने, कमिसन खाने, पैसा लिएर नियुक्ति, पैसा लिएर नियुक्ति, पैसा लिएर सरुवा बढुवा, कमिसन लिएर ठेक्का दिने वा काम लिने जस्ता कुराहरू र कमिसनका भरमा खेलबाड हुने कुराहरूलाई यस्तो चल्दैन यो नगरौँ भनेको थिएँ,” उनले भने ।

“त्यो भनेपछि किन झस्किनुभयो ? भोलिपल्ट पाँच अर्ब खाने भयो भनेर पत्रिकालाई लेखाउनुभयो । यो छापेपछि मैले उहाँहरूलाई सोधेँ, यो के लेखाउनुभएको ? कसले मलाई पाँच अर्ब दिन्छ ? मैले भनेँ, म भ्रष्टाचार गर्ने मान्छे हैन । भ्रष्टाचार रोक्ने मान्छे हो,” ‌ओलीले थपे ।

उनले आफूलाई पत्यार नलागेको कुरा पनि बताएको जानकारी दिए । आफूले त्यस विषयमा चासो राखेपछि अर्थमन्त्री र प्रधानमन्त्री नै छटपटिएको पनि उनले बताए ।

“मैले उहाँहरूलाई के भने भने, यो तपाईंहरूले राम्रो गर्नु भएन । अर्काे कुरा त कर्मचारीले पाँच अर्ब कहाँबाट ल्याएर दिन्छ ? मलाई पत्यार त लागेको छैन । तर, तपाईंहरूले जे गर्दै हुनुहुन्छ, यो बन्द गर्नुहोस्,” उनले भने, “त्यसपछि उहाँहरू छटपटाउनुभयो । म यो राष्ट्रिय विपत्‌को बेला यसपट्टि धेरै जान चाहन्न ।” 

सर्वाेच्च अदालतले पहिलेकै अवस्थाबाट प्रक्रिया थाल्न भनेपछि अहिले बोर्डको अध्यक्ष छनोट प्रक्रिया अगाडि बढाइएको पनि प्रधानमन्त्री ओलीले बताए ।