काठमाडौं । नेपाल प्रज्ञा प्रतिष्ठानले यही वैशाख १८ गतेसम्म आयोजना हुने गरी पुस्तक प्रदर्शनी थालेको छ । वैशाख २ देखि प्रतिष्ठानकै भानुभक्त कक्षमा प्रदर्शनी सुरु भएको हो ।
  
प्रदर्शनीमा राखिएका पुस्तक खरिद गर्नेहरूका लागि २० प्रतिशतदेखि ४० प्रतिशतसम्म छुट दिइएको प्रतिष्ठानले जनाएको छ । उक्त प्रदर्शनीमा अमरकोश, नेपाली साहित्यकोश, कौटिल्यको अर्थशास्त्र, जाँ ज्याक रुसको कन्फेसन्स, ईषादि नौ उपनिषद्, ग्रिक महाकवि होमरको ओडिसी, हरेराम जोशीको प्राचीन अभिलेख, गुमानसिंह चाम्लिङको एरिस्टोटल र उनका काव्य शास्त्र ‘पेरी पोइएतिकेस’लगायत पुस्तकहरू राखिएको छ ।
 
बजार व्यवस्थापन शाखाकी अधिकारी सविना ज्ञवालीले बाह्रखरीसँग कुरा गर्दै प्रदर्शनीमा भाषा, साहित्य, कला संस्कृतिलगायत इतिहास, दर्शनशास्त्र र समाजशास्त्र विशेष पुस्तकहरू राखिएको बताइन् ।
 
ज्ञवालीले भनिन्, “पुस्तक प्रदर्शनीमा आउने पाठकहरूको रुचि दर्शनका पुस्तकहरूप्रति विशेष रहेको मैले अनुभव गरेकी छु । त्यसबाहेक संस्कृति, इतिहास विषयक पुस्तकहरू पनि पाठकको रोजाइमा रहेको छ ।”

ज्ञवालीले अघिल्ला पुस्तक प्रदर्शनीमा पनि पाठकको रुचि इतिहास, दर्शन र संस्कृतिप्रति नै रहेको उल्लेख गर्दै पछिल्लो समय अनुसन्धानका लागि उपयोगी पुस्तकहरूको खोजी गरिँदै आइएको बताइन् । 

यसपटक पनि प्रदर्शनीमा राखिएका पुस्तकहरू विशेष छुटमा दिइएको उनले बताइन् । 

अघिल्ला प्रदर्शनीहरूमा साझा प्रकाशनले पनि आफ्नो स्टल राख्दै आएकोमा बिहीबारसम्म साझाको स्टल राखिएको थिएन ।