काठमाडौं । अविरल वर्षा र विपद्का कारण चलचित्र क्षेत्र पनि प्रभावित भएको छ ।  प्रदर्शनमा आएको ‘सानो संसार’ र ‘आँखा’ प्रभावित हुँदा ‘पूर्ण बहादुरको सारङ्गी’को गीत पनि ओझेलमा परेको छ ।  

‘पूर्ण बहादुरको सारङ्गी’को दोस्रो गीत ओझेलमा परेको हो । अविरल वर्षा र विपद्का कारण ‘पूर्ण बहादुरको सारङ्गी’को दोस्रो ‘दाहिने हातैमा’मा ओझेलमा परेको हो । 

पहिलो गीत ‘काँधेकुरी’ले राम्रो प्रतिकृया पाए पनि शनिबार सार्वजनिक भएको गीत भने वर्षाजन्य प्राकृतिक विपद्का घटनामा सबैको ध्यान केन्द्रित हुँदा ओझेलमा परेको हो । 

विपद्का कारण अर्जुन कुमार र माधव वाग्लेको निर्माणमा बनेको चलचित्र ‘सानो संसार’ प्रदर्शन स्थगित नै भयो । शुक्रबारबाट प्रदर्शनमा आएको चलचित्र अविरल वर्षाका कारण दर्शक हलमा जान नसक्ने र विपद्को समयमा नैतिक रूपमा प्रचार पनि गर्न नसक्ने भन्दै शनिबारबाट प्रदर्शन स्थगित गरिएको थियो । 

यही विपद्को मारमा अर्को चलचित्र ‘आँखा’ पनि पर्यो । ‘सानो संसार’सँगै प्रदर्शनमा आएको चलचित्रले पनि वर्षा र यसले सिर्जना गरेको विपद्का कारण दर्शक गुमायो । याे चलचित्रले पनि अवस्था सहज भएपछि पुनः रिलिज गर्ने भन्दै अहिलेका लागि हलबाट सिनेमा उतारेकाे छ ।

‘पूर्ण बहादुरको सारङ्गी’को ‘दाहिने हातैमा’मा बोलको गीतमा शब्द, संगीत तथा स्वर प्रशान्त शिवाकोटीको छ । गीतले सिनेमाका प्रमुख पात्रहरूको जीवनको कथा भनेको छ । दिनरात गाउँगाउँ हिँडने गन्दर्भको यथार्थ गीतले प्रष्ट पारेको छ ।

गीतमा चलचित्रमा मुख्य पात्र विजय बराल, मुकुन भुसाल, अञ्जना बराइली, बुद्धि तामाङ, देशभक्त खनाललगायत कलाकार देखिन्छन् । 

सरोज पौडेलको लेखन तथा निर्देशन रहेको चलचित्र कात्तिक १५ गते रिलिज हुँदैछ । चलचित्रमा विजय बराल, प्रकाश सपूत, मुकुन भुसाल, बुद्धि तामाङ, अञ्जना बराइली, माओत्से गुरुङ, देशभक्त खनाल, भोलाराज सापकोटा, विनोद न्यौपाने, अलिसा बास्तोला, श्याम केसी, जानवी पौडेललगायतको अभिनय छ ।

सिनेमाको पटकथा तथा संवाद महेश दवाडीले लेखेका छन् । विनोद पौडेल र प्याट्रिक सुवेदीको लगानी रहेको सिनेमाका कार्यकारी निर्माता रमेश चौलागाईं, हरि श्रेष्ठ र रमेश ढकाल हुन् ।