काठमाडौं । काठमाडौं उपत्यकासहित देशभर तीन दिनदेखिको वर्षाका कारण जनजीवन अत्यन्तै प्रभावित बन्यो । देशभर ११२ जना भन्दा बढी नागरिकको ज्यान गयो भने कम्तिमा पनि ७० जना बेपत्ता छन् ।
काठमाडौं, ललितपुर, भक्तपुरलगायतका क्षेत्रमा पनि ठूलो जनधनको क्षति भएको छ । विपद्को यो अवस्थामा निजी क्षेत्रले पनि विभिन्न माध्यमबाट सरकारी निकायसँग सहकार्य गर्दै आएका छन् ।
ललितपुरको नक्खुस्थित हार्मोनी कोलोनीभित्र फसेका नागरिकको उद्धारमा गरुड सेक्युरिटिजका प्रतिनिधि पनि खटिएको जनाइएको छ ।
“एक तलामाथि नै पानी भरिएको थियो । धेरै परिवार आत्तिनुभएको थियो,” गरुड सेक्युरिटिजका प्रबन्ध निर्देशक सवलचन्द्र शाहले भने, “हामीले यस्तो अवस्थामा सरकारी निकायसँगै उपस्थित भएर साथ दिएका हौँ ।” उनले प्रहरी र स्थानीयसँगै हातेमालो गरेर उक्त कोलोनीबाट धेरै व्यक्तिलाई बाहिर निकाल्न सफल भएको बताए ।