काठमाडौं । प्राइम कलेजले भारतको केपीएमजीसँग साझेदारी गरी नेपालमै पहिलोपटक अमेरिकी सर्टिफाइड पब्लिक एकाउन्टेन्ट (सीपीए) टेस्ट तयारी कार्यक्रम सुरु गर्ने भएको छ । उक्त कार्यक्रम सञ्चालनका लागि भारतको केपीएमजीसँग कलेजले औपचारिक सम्झौता गरेको हो ।

यस सम्झौताबाट नेपाली वित्तीय पेसेवर तथा विद्यार्थीहरूलाई विश्वव्यापी मान्यता प्राप्त अमेरिकी सीपीए प्रमाणपत्र प्राप्त गर्ने अवसर हुने भएको छ । उनीहरूका पेसागत सम्भावनाहरूको प्रवर्धन हुनुका साथै अन्तर्राष्ट्रिय वित्तीय बजारमा उनीहरूले राम्रो सफलता प्राप्त गर्न सक्षम हुने अपेक्षा गरिएको छ ।

यो कोर्स पढ्न सीए र एसीसीएको शुल्कभन्दा सस्तो पर्ने बताइएको छ । यस कार्यक्रमको माध्यमबाट प्राइम कलेज र केपीएमजीले संयुक्त रूपमा नेपाली विद्यार्थीहरूलाई अन्तर्राष्ट्रिय वित्तीय सेवा क्षेत्रमा प्रतिस्पर्धात्मक लाभ प्रदान गर्ने लक्ष्य राखेका छन् ।

अमेरिकी सीपीए एक अन्तर्राष्ट्रिय रूपमा मान्यता प्राप्त प्रमाणपत्र हो । यो अमेरिका सम्बद्ध कम्पनीहरू वा बहुराष्ट्रिय संस्थाहरूमा काम गर्न चाहने वित्तीय पेसेवरहरूको लागि धेरै फाइदाजनक हुने हुँदा यसको मुख्य जोड अमेरिकी जनप्रिय लेखा मानकमा छ ।

यो कोर्स १२ देखि १८ महिनामा नै पूरा गर्न सक्दछन् । यो लेखा र वित्तमा करिअर अगाडि बढाउन चाहनेहरूका लागि एक छोटो र प्रभावकारी विकल्प रहने बताइएको छ ।