काठमाडौं । कुमार रम्तेलले सुप्रिम बचत तथा ऋण सहकारी संस्था बुटवलबाट आफ्नो नाममा करिब एक करोड ९० लाख रुपैयाँको कृत्रिम ऋण खडा गरी करिब ७ लाख किस्ता तिरिएको ऋणी पूर्वगृहमन्त्री रवि लामिछाने नै भएको बयान दिएका छन् । 

सहकारी छानबिन विशेष समितिको प्रतिवेदनमा रम्तेलले उक्त ऋणको बाँकी रकम गोरखा मिडिया नेटवर्ककको खातामा गएको बताएका छन् ।
 
“सूर्यदर्शनबाट भएको कारोबारबारे मलाई जानकारी भएन । तर, सुप्रिम बचत तथा ऋण सहकारी संस्था बुटवलबाट मेरो नाममा करिब १ करोड ९० लाखको कृत्रिम ऋण खडा गरी करिब ७ लाख किस्ता तिरिएको ऋणी रवि लामिछाने र करिब १७ लाख किस्ता तिरिएको छविलाल बन्जाडे जोशीको किस्ता तिरिएको हो,” उनले बयानमा भनेका छन्, “ऋणी रवि लामिछाने पूर्वउपप्रधान तथा गृहमन्त्रि एवम् प्रतिनिधिसभाका सदस्य र किस्ता तिरिएको छविलाल बन्जाडे जोशी पूर्वप्रहरी नायव महानिरीक्षक हुनुहुन्छ भन्नेमा म यकिन छु । सो ऋणको बाँकी रकम गोरखा मिडिया नेटवर्कको खातामा गएको देखिन्छ ।”
 
समितिले रवि लामिछानेको सूर्यदर्शन, पोखरामा सृजना चोक कास्की र सुप्रिम, बुटवलमा बुटवल ठेगाना राखि पहिचान खुल्ने आवश्यक कागजात र प्रक्रिया पूरा नभएको अवस्था रहेकोमा कुन आधारमा लामिछाने भएको एकिन गरेको भन्ने प्रश्नमा उनले आफ्नो नाममा खडा गरिएको कृतिम ऋणबाट गोर्खा मिडियामा जानुले सो कुरा पुष्टि भएको दाबी गरेका हुन् ।
 
“मेरो नाममा खडा गरिएको ऋण कृत्रिम ऋण हो । मैले चिनेको रवि लामिछाने पूर्वउपप्रधान तथा गृहमन्त्री नै हुन् । मेरो नाममा खडा गरिएको कृत्रिम ऋणबाट किस्ता तिरी बाँकी रकम गोर्खा मिडिया नेटवर्कको खातामा जानुले पनि यो कुरा पुष्टि हुन्छ । त्यसैले उक्त रकम तिरिएको व्यक्ति पूर्वउपप्रधान तथा गृहमन्त्री रवि लामिछाने नै हुन् भन्ने कुरा म यकिन साथ भन्न सक्छु,” बयानमा भनिएको छ, “तर रवि लामिछानेको ऋण खाता वास्तविक हो वा कृत्रिम हो भन्न सक्दिनँ । रवि लामिछाने उहाँको पर्टीको बुटवल–नारायणगढ पदयात्रामा हुँदा मैले दीपक बोहोराको मोबाइलमा सम्पर्क गरी उहाँसँग कुरा गर्दा सहकारी चलाउने र ऋण लिनेमा तपाईंको कागजात र हस्ताक्षर नभए पनि आजको स्थिति आउनमा तपाईंको भूमिका छ समेत भनेको थिएँ ।”